Хан во Сараево: Економијата носи напредок во процесот на европски интеграции

Тричасовниот состанок на премиерите од државите од Западен Балкан заврши денеска во Сараево. Состанокот беше во рамки на подготовки за претстојниот четврти самит на Берлинскиот процес што ќе се одржи во јули.

Домаќинот, претседавачот со Советот на министри на БиХ Денис Звиздиќ рече дека стабилноста мирот и безбедноста на овој простор се клучни за политички, социјални и економски развој на државите од Западен Балкан поради што „премиерите на државите имаат одговорност да ги задржат нашите земји на европскиот пат“.

На состанокот присуствуваше и европскиот комесар за проширување Јоханес Хан. Тој порача дека државите членки на ЕУ и покрај изборите кои се во тек или следат во повеќе држави, во целост се приврзани за процесот на ширење на западен Балкан. Предупреди дека државите од регионот не смеат да дозволат пречки да загрозат остварен напредок.

Како најважно прашање Хан ја наведе економијата бидејќи како што објасни, економијата прво носи напредок во процесот на европски интеграции. Спомена и за понатамошно поврзување на инфраструктурата и економиите.

Конференцијата почна со свечено доаѓање на премиерите на Србија, Црна Гора, Македонија, Албанија. На собирот беше и шефот на косовската влада Иса Мустафа и Анџелино Алфано, министер за надворешни работи на Италија, следна држава домаќин на Самит на држави од Западен Балкан во јули во Трст.

МИА

При објавување на материјали од порталот emagazin.mk во друг медиум, задолжително поставете активен линк кон страницата од која е преземен текстот.

Коментари

Тагови