Википедија се збогатува со содржини од македонската историја

Државниот архив на Република Македонија информира дека проектот „Македонски војводи и револуционери“ забрзано се реализира на Википедија и веќе ги дава очекуваните резултати.

- Над 155 постоечки статии за личности од македонско револуционерно минато се веќе надополнети со научно-потврдени сознанија, креирани се 40 нови статии за историски личности од овој период на Википедија на македонски јазик, соопшти Државниот архив. 

Овој проект се реализира од 20 јануари 2017 година во соработка со Здружението за споделување слободни содржини ГЛАМ Македонија од Скопје и ќе трае до јуни. Проектот, како што се наведува, треба да постигне дополнување и поткрепување со проверени извори од македонската историска наука на постоечките статии за македонските војводи и револуционери, но и да се создадат нови статии за ликови од македонската историја за кои досега не постоела статија на Википедија на македонски јазик. 

Според директорот на Државниот архив Филип Петровски на овој начин се дава придонес во достапноста на македонската историска вистина и афирмацијата на минатото на македонскиот народ на Википедија на македонски јазик за сите заинтересирани. Во проектот активно се вклучени неколку вработени во Државниот архив и членови на Здружението ГЛАМ Македонија. 

Државниот архив, според Петровски, и понатаму ќе продолжи со реализација на проекти кои ќе го популаризираат историското минато на македонскиот народ. 

При објавување на материјали од порталот emagazin.mk во друг медиум, задолжително поставете активен линк кон страницата од која е преземен текстот.

Коментари

Тагови