Русија загрижена поради тоа што Пентагон собира руски генетски материјал

218 Views Ноември 9, 2017 Свет Редакција Емагазин

Москва е загрижена поради студијата на Пентагон, во рамки на која прибира генетски материјал од руски граѓани на територијата на Русија, изјави денеска портпаролката на Министерството за надворешни работи Марија Захарова.

Таа наведе дека „недостигот на транспарентност во активностите на Пентагон за медицинската студија и големото внимание насочено кон неа, укажува на потребата да се зајакнат мерките со кои се обезбедува генетската безбедност на Русија“.

- Многу сме загрижени од фактот што Министерството за одбрана на САД спроведува истрага за генетскиот материјал собран од граѓани на Русија, рече Захарова и оцени дека официјалното објаснување на Пентагон звучи неубедливо.

Во понеделникот, рускиот претседател Владимир Путин, на состанок на Советот на ОН за човекови права, рече дека некој, ширум Руската Федерација, собира примероци од ткива од различни етнички групи и тоа со нејасни цели.

Оваа изјава на Путин го насочи вниманието на веста од пред неколку месеци, која речиси незабележано мина во светските медиуми, дека на сајтот на Министерството за одбрана на САД е објавен повик за купување генетски примероци од Руси со европско потекло. На сајтот беше наведено дека Владата нема да ги признае генетските примероци од Украина.

САД подоцна потврдија дека собирањето генетски материјал од руски граѓани било поради истражување за мускулно-скелетен систем.

Во вторникот, портпаролот на Кремљ Дмитриј Песков изјави дека руските разузнавачки служби ги регистрирале тие активности и оти за нив знае и рускиот претседател.

Веднаш потоа, во руските медиуми се огласија и воени експерти и научници кои предупредија дека порачувањето примероци од РНК од руски донатори би можело да биде поврзано со биолошко оружје или со подготовка за неговоо тестирање.

„Биолошка војна или предизвикување епидемија на одредени болести се смета за многу ефикасен начин за уништување жива сила, истовремено се зачувува инфраструктурата на непријателите“, коментираат руските весници.

Тие уште тврдат дека бројот на американски воени биолаборатории во опкружувањето на Русија се зголемува и некои од нив веќе се стационирани во Грузија, Украина, Казахстан...

Московскиот генетичар Валериј Иљински потврди дека генетскиот материјал од различни етнички групи од Русија завршува во САД.

– Таму веројатно ќе биде искористен во мирољубиви цели, но воена употреба не може во целост да се исклучи, истакна Иљински, директор на московската компанија „Генотек“, која се занимава со истражувања на човечки геноми.

Според неговите сознанија, еден центар во Москва и еден во Санкт Петерсбург прибираат биолошки материјали од различни народи во Русија и ги испраќаат во САД, а судејќи по пропратната документација, главна цел е истражување на разновидноста на геномите и одредени болести.

Сепак, дел од научниците тврдат дека не само што е можно примероци од ткиво да се користат за „нова генерација биолошко оружје“, туку на тоа поле доста се работело и сега вирусите, наводно, можат да се програмираат против еден единствен народ.

Генетичарот Иљински тврди дека иако не се познати случаи на генетски истражувања во воени цели, како што е создавање биолошко оружје, теотретски е сосема можно.

Кон почетокот на месецот Пентагон потврди дека собрал 39 примероци од руски генетски материјал.

- Примероците се наопходни за испитување на мускулно-скелетниот систем. Изборот на Руси за ова истражување не беше намерен, изјави Бо Дауни, претставник на Командата на воздухопловството на САД.

Истражувањето го спроведува 59. Медицинска група од Молекуларниот истражувачки центар за да „фрли светло на различните биомаркери поврзани со повреди“.

Захарова, пак, денеска истакна дека САД требало да пружат дополнителни докази.

- Ние веруваме дека Министерството за одбрана на САД треба да пружи силни докази дека со оваа студија не се крши меѓународното право, истакна Захарова.

Според неа, транспарентноста е неопходна кога станува збор за областа генетика, бидејќи, „репутацијата на Пентагон е веќе оштетена“.

- Постојат бројни примери. Доволно е да се спомне испораката на живии бактерии од антракс, која ја изведе лабораторијата на Министертсвото за одбрана, истакна Захарова. 

МИА

При објавување на материјали од порталот emagazin.mk во друг медиум, задолжително поставете активен линк кон страницата од која е преземен текстот.

Коментари

Тагови