Сите детали: Американци го следеле Милан Зарубица, кој беше уапсен во Мала Речица

562 Views Декември 7, 2017 Балкан Редакција Емагазин

Милан Зарубица, некогаш угледен фармацевт кој докторирал на анализа за лекување карцином, а подоцна станува озлогласен српски нарко-хемичар, е еден од главните организатори на нелегалното производство на амфетамини во „лабораторијата“ во Тетово, пишува српскиот весник „Блиц“,

Тој беше уапсен неодамна во Мала Речица, во фабриката за екстази и за каптагон, но тоа не е неговото прво апсење.

Како што пишува Блиц, Милан Зарубица од Земун, по ненадејната смрт на неговиот брат, фармацевт и стоматолог, Горан Зарубица, во деведесетите години на минатиот век, го презел неговиот бизнис со увоз на лекови и на фармацевтска опрема, го развил, но набргу зачекорил на другата страна на законот.

Милан докторирал на почетокот од деведесеттите години на минатиот век, со дисертација за лекување рак на тироидната жлезда на медицинскиот факултет во Белград, а откако го презел фармацевтскиот бизнис од брат му, односно во моментот на првото апсење во февруари 2003 година, бил сопственик и косопственик на фирмата „Ленал НБЦ“ и уште пет фирми за увоз на лекови и на фармацевтска опрема – „Микропоинт“, „Давидшпед“, „Варан фармасеутикалс“, „Варан кемикалс“ и „Кимел“.

Повремено хонорарно ангажирал професори од Фармацевтскиот факултет во Белград, а таму доведувал и светски имиња.

Истовремено го ширел и бизнисот со производство на синтетички дроги, сокривајќи го зад фиктивните фирми кои му биле параван за продажбата, сè до моментот кога„го извезува„ бизнисот во Македонија. За тоа, како што пишува „Блиц“, информацијата дошла од американската агенција за борба против дрогата ДЕА.

Милан Зарубица првпат е уапсен на 4 февруари 2003 година, заедно со неговиот татко Филип, пред дрогата од тогаш најголемата балканска „фабрика“ да ја продаде на купувачи од Македонија и од Бугарија. Иако нивниот идентитет не се дознал, Зарубица добил 11 години затвор.

Но, затворската управа на докторот на науки од Земун му дала повластен статус и слободни викенди, а тој тоа го користел за развивање на „бизнисот“, во кој го вклучил и внукот од брат, Бојан Зарубица, кој исто така бил уапсен во Белград, во рамките на големата акција на полициите на Македонија, Србија и на ДЕА.

Второто апсење на Милан поради производство и продавање синтетички дроги се случило на 12 мај 2011 година, откако на границата со Македонија била фатена негова пратка за двајца Турци и за еден Македонец.

И откако во последниот ден до 2014 година излегол од затвор отслужувајќи ја првата затворска казна, следната година направил спогодба со српското обвинителство за организиран криминал за случајот од 2011 година, признавајќи дека поседува опрема и материјал за производство на синтетичка дрога, но специјалниот суд му ја потврдил казната и му изрекол единствена казна за случаите од 2003 и од 2011 година, односно 11 ипол години без решетки.

Сепак, бидејќи веќе ја одлежал, не се вратил во затвор.

Потоа, пишува Блиц, со клиентите од Македонија кои првин му купувале дрога, а потоа посакале и повеќе и го довеле во Македонија за да произведува, бил следен од ДЕА, која заедно со српската и со македонската полиција обезбедила докази за да го врати зад решетки.

Милан Зарубица сега е во 30-дневен притвор по барање од Основното јавно обвинителство за гонење организиран криминал и корупција на Македонија.

Извор: Блиц

При објавување на материјали од порталот emagazin.mk во друг медиум, задолжително поставете активен линк кон страницата од која е преземен текстот.