Некропола од архајскиот период (6 век пр. Христа) е пронајдена во струшкото село Корошишта, а дел од 80. наоди денеска и беа презентирани на јавноста.
Пронајдени се бронзен шлем, златни прстени, килибарни и стаклени перли, златни фолии со различни форми и декорација, сребрени игли, бронзен сад за вино, сребрен кантарос, бронзени чинии…
Новите пронајдоци се резултат на археолошките истражувања од проектот за „Систематски археолошки истражувања на архајската некропола Корошишта“ на Археолошкиот музеј Скопје, што се одвиваат на локалитетот Расница во атарот на Корошишта.
Како што информираа од Министерството за култура и туризам се започнало во 2020 година кога Шефит Шемшедини при извршување на земјоделски работи во атарот на Корошишта, открил бронзен шлем, кој потоа го предал во Завод и музеј Охрид.
Во 2023 година тимот од Археолошкиот музеј добил согласност од сопственикот на нивата, Букури Шемшедини, за вршење археолошки истражувања.
Фото: МКТ