Администраторот и креаторот на „Јавна соба“ повикани во полиција, МВР ќе поднесе кривична пријава

Заменик-министерката за внатрешни работи Славјанка Петровска информираше дека администраторот и креаторот на групата „Јавна соба“ биле во полициска станица и против нив ќе биде поднесена кривична пријава.

„Продолжува истрагата на Бирото за јавна безбедност (БЈБ) во врска со групата „Јавна соба” на Телеграм. Вчера вечер во полициска станица беа повикани две лица, од кои едното е администратор, а другото креатор на групата „Јавна соба”.

По извршените разговори и прибавените докази против нив ќе биде поднесена кривична пријава. БЈБ продолжува со активности за евентуална вмешаност и на други лица“, напиша Петровска на нејзиниот фејсбук-профил.

ПОВРЗАНИ ВЕСТИ

Каква апликација е Телеграм, преку која македонски средношколци споделуваат порнографски материјал од малолетнички

(Видео) Чулев: Ги бараме одговорните за „Јавна соба“ преку „Телеграм“ во Лондон, објавени 800 фотографии и видеа

Жртва на групата „Јавна соба“ на “Телеграм“ за А1он: Сандачето ми е полно со машки полови органи и прашања колку треба да платат за секс