Во Македонија, секоја година во периодот 2008-2017 година, во просек се случувале по 4.141 сообраќајна несреќа во коja имало загинати, потешко и/или полесно повредени лица (во кои не се опфатени сообраќајните несреќи со материјална штета).
Притоа, животот го губеле во просек 158 лица, а потешко и полесно биле повредени по 6.285 лица.
Ова се вели во кратката анализа на Центарот за интернет, развој и добро владеење „Импетус“.
„Причините за големиот број на сообраќајни несреќи најмногу се наоѓаат во субјективниот фактор – човекот, што упатува на заклучокот дека анализата на безбедноста во патниот сообраќај, првенствено треба да биде насочена кон проучување на одговорноста и карактеристиките на човекот како учесник во сообраќајот.
Учесниците од една страна се директни причинители за настанување на сообраќајни несреќи, но истовремено и директни жртви од нив. Тие може да настрадаат поради опасните (неправилни, непрописни, неодговорни) однесувања на другите учесници, но и поради сопствените грешки.
Според пресметаните индикатори се констатира дека сообраќајно-безбедносна состојба на патиштата во Република Македонија е неповолна. Тенденциите во функционирањето на сообраќајот на патиштата, се алармантни, загрижувачки и неприфатливи за нашето општество“, се вели во анализата.