Очите на македонската јавност денеска се вперени во Уставниот суд кој треба да ја оцени иницијативата на „Левица“ со која се бара референдумот за прифаќање на договорот со Грција и зачленување во ЕУ и НАТО да биде прогласен за неуставен.
За Левица спорни се референдумското прашање, ратификацијата, како и видот на референдумот. Оттаму сметаат дека прашањето е претенциозно, интенционално и суштински погрешно формулирано.
„Во референдумското прашање веќе се крие посакуваниот одговор или барем подобниот начин како треба, т.е. како е „правилно“ да се одговори, и тоа исклучиво во пакет, односно „во тројка“!? Па така, доколку сте ЗА едно од трите понудени прашања, автоматски сте принудени да бидете ЗА и за останатите две, и покрај фактот што можеби тоа не е вашата вистинска волја. И обратно, ако сте ПРОТИВ било кое од трите прашања, автоматски произлегува дека сте против сите три – што, реaлно, не мора да значи! Колку за илустрација, ваквите неразбирливо поставени, извртени и сугерирачки прашања се забранети во нашето процесно право: „Не е дозволено да се поставуваат прашања во кои веќе е содржано како би требало да се одговори“! [чл. 229, ст.1 од Законот за парнична постапка (2005)]; а слична ваква појаснувачка и ограничувачка одредба содржи и чл. 208 од Законот за кривичната постапка (2010), кога го регулира судското испрашување на сведоците и на вештаците“, напиша неодамна Димитар Апасиев од Левица.
Сепак, прашање е како Уставниот суд ќе го оцени овој аргумент со оглед на тоа што во 1991 година прашањето на референдумот гласеше: „Дали сте за суверена и самостојна држава Македонија со право да стапи во иден сојуз на суверените држави на Југославија?“, што е исто така двосмислено на своевиден начин, бидејќи освен осамостојувањето се спомнува стапување во сојуз на држави.
И покрај многубројните забелешки на прашањето во 1991 година, референдумот се одржа, а Македонија стана самостојна држава.
ПОВРЗАНИ ВЕСТИ
Детали за постапката: Ќе си легне ли Уставниот суд на брашното или ќе го запре референдумот?
Кои се уставните судии кои ќе одлучуваат дали ќе се стопира постапката за референдумот за името