Новата Влада ќе се фокусира на изградба на инфраструктура што ќе значи иднина за македонската економија, а ќе ги стопира инвестициите во непродуктивни проекти, како Скопје 2014, пишува во програмата на Владата 2017-2020 година.
Ова е само едно од неисполнетите ветувања иако изминаа две години откако дојде на власт Владата предводена од премиерот Зоран Заев. Имено, се уште во фаза на градба се започнатите мостови и други објекти од Скопје 2014, а од амбициозните најави за нова инфраструктура се уште нема ништо.
„Владата ќе ги носи одлуките за големите инвестиици во инфраструктурата транспарентно и низ консултации со граѓаните и релевантните експерти. Владата како свои цели ги поставува реализацијата на проектите: „Македонија мегалополис“, инфраструктурно поврзување меѓу најголемите центри за не повеќе од 90 минути, „Македонија без црни точки” и „Македонија без кал”“, пишува во програмата на Владата.
Во неа беше најавено дека Владата ќе формира компанија со доминантна државна сопственост (51%) преку која ќе се реализираат инвестициите во инфраструктурни проекти и во обновливи извори на енергија.
„Почетната големина на компанијата ќе биде 300 милиони евра. Владата ќе иницира преговори за финансирање на 3 приоритетни инфраструктурни проекти преку иницијативата 16 земји од Европа плус Кина „тешка“ над 10 милијарди долари.
Владата ќе усвои план за инвестиции во патната инфраструктура од 3 милијарди евра во следните 10 години со што ќе го зголеми сегашниот финансиски недостиг за одржување на патиштата. Преку овие инвестиции, Владата ќе обезбеди изградба на 600 километри автопатишта и експресни патишта, 550 километри магистрални и регионални патишта и 1.000 километри локални патишта“, пишува во програмата.
За жал, граѓаните се уште ќе почекаат на реализација на овие планови и ветувања, со оглед на тоа што освен неколку автопатски делници кои беа изградени од претходните владејачки гарнитури во изминативе две години немаше реализација на некој поголем инфраструткурен проект.