Утре на седница на собраниската Комисија за деловнички и мандантно-имунитетни прашања ќе се разгледува предлогот за одземање на пратеничкиот мандат на Никола Груевски.
Предлогот за одземање на мандатот на Груевски е врз основа на добиено известување од Основниот суд Скопје 1 Скопје, Одделение за организиран криминал и корупција за пресуда од 23.05.2018 година со која пратеникот е осуден на казна затвор во траење од две години за случајот „Тенк“ на Специјалното јавно обвинителство.
Поранешниот премиер и лидер на ВМРО-ДПМНЕ најдоцна до 8 ноември треба да се јави на издржување на двегодишната казна затвор.
Кога на пратеник му се одзема или му престанува мандатот?
Овие прашања се дефинирани и во Законот за пратеници.
Во член 8 од овој Закон пишува:
„На пратеникот му престанува мандатот пред истекот на времето за кое е избран, ако: поднесе оставка, е осуден на кривично дело за кое е пропишана казна затвор во траење од најмалку пет години, настапи случај на неспојливост на функцијата, му престане државјанството на Република Македонија, со правосилно решение биде лишен од деловната способност и во случај на смрт“.
Во член 17 од овој закон, пак стои дека: „пратеникот ужива имунитет за времетраењето на мандатот. Пратеникот не може да биде притворен без дозвола на Собранието, освен ако бил затечен во вршење на кривично дело за кое е пропишана казна затвор во траење од најмалку пет години“.
Фото: ВМРО ДПМНЕ
ПОВРЗАНИ ВЕСТИ
Судот ја одби молбата на Никола Груевски: Екс-премиерот со една нога во Идризово
Груевски бара одлагање на казната поради пратеничките обврски и бидејќи пишува книга