Инспекторатот за туризам при Општина Струга, во соработка со Полициската станица од Струга ќе врши контрола на правните и физичките субјекти, кои даваат услуги за сместување туристи.
Целта, како што соопшти општинската прес-служба, е подобрување на условите за престој на туристите и посетителите во текот на претстојната летна сезона.
– Безбедноста и сигурноста на туристите, посетителите и гостите од земјата и од странство, кои престојуваат и ја посетуваат Струга, е најголем приоритет. Струга мора и треба да биде атрактивна туристичка дестинација, која на туристите ќе им обезбеди чувство на сигурност и безбедност, а тоа пак значи пријатен претстој и фактор за поголемо привлекување на постојните и потенцијалните туристи, посочува Општина Струга.
На територијата на Општина Струга има значителен број даватели на услуги за сместување туристи во соби и апартмани, кои се запишани и категоризирани во општинскиот регистар.
– Решението за категоризација, кое се добива по одредена постапка, значи дека физичкото лице кое дава услуги за сместување, својата дејност ја врши легално, односно почитува повеќе закони и подзаконски акти, се вели во соопштението.
За непочитување на законите се определуваат високи казни, односно забрана за вршење на дејноста и парична казна во зависност од нивото на прекршување на законските одредби.
Фото: Општина Струга/Фејсбук