Македонските граѓани, а посебно жителите на Скопје, Тетово, Битола ќе се гушат и оваа зима бидејќи Владата каска со реализацијата на Планот за чист воздух според кој до 2020 година загадувањето на воздухот во главниот град треба да се намали за 50 отсто, а во останатите градови од 30 до 50 отсто.
Имено, метереолозите предвидуваат пад на температурите со што наскоро би требало да почне и грејната сезона. Со оглед на тоа што греењето на домовите е посочено како еден од главните извори на загадување на воздухот станува јасно дека и оваа зима повторно ќе бидеме изложени на отровен воздух бидејќи Владата не спроведе речиси ниту една од ветените мерки во Планот за чист воздух.
Тоа го потенцираа и од граѓанската иницијатива „Колиција О2“ кои укажуваат дека на три месеци до крајот на 2019 година, не се исполнети редица активности од владиниот план.
Владата вети, а не донесе забрана за користење на јаглен и закон за индустриски емисии. Не се воспоставени контроли на загадувачите, неисправни се мерните инструменти и не се воведе јавен превоз кој нема да загадува.
Исто така, се каска со замената на греењето во домаќинствата, градинките, училиштата, здравствените и административните објекти, воведување енергетската ефикасност и со инсталирањето на филтри во малите и средни фирми од дрвната индустрија.
Наместо итно спроведување на овие и другите ветени мерки Владата уште еднаш на дело покажа дека е бавна во реализација на проектите кои се од круцијално значење за заштита на здравјето на населението, што доволно говори за нејзиниот капацитет и грижа за македонските граѓани.