еМагазин
Image default
Македонија ТОП СТОРИИ

(Фото) Можен ризик од одрон на карпа од 20 тони над браната Матка, надлежните да ја проверат состојбата, апелира Ангелов

Центарот за управување со кризи (ЦУК) доби известување од ЕВН за нестабилна карпа во реонот на кањонот Матка, што се наоѓа стотина метри високо над самиот ѕид на браната. Оваа карпа се наоѓа во ваква позиција долго време, според добиените фотографии може да се забележи одредена нестабилност, а ние како институција испративме барање до повеќе релевантни институции коишто треба да излезат на терен, информираше денеска директорот на ЦУК, Стојанче Ангелов.

Се работи за карпа, како што рече, којашто според првичните информации е долга од шест до осум метри кубни и тежината и е околу 20 тони.

-Се работи за голема кинетичка енергија. Кога оваа карпа би паднала во браната има неколку потенцијални правци на движење. Бидејќи самата карпа се наоѓа блиску до сртот и врз правецот можат да влијаат повеќе фактори.

Воедно при лизгањето на оваа карпа можат да бидат предизвикани лавина од други камења и карпи што би паднале најверојатно во водата во близина на ѕидот. Од првичните информации што ги имаме од ЕВН овие карпи не би ја загрозиле самата брана и ѕидот, но ние дополнително сакаме да ги провериме ваквите податоци, вели Ангелов.

Ова е едната од можните линии по којашто би се движела паднатата карпа и како што може да се забележи падот би бил во непосредна близина на испустот од каде што истекува водата којашто оди во електраната или вишокот на водата доколку браната е преполна.

Директорот на ЦУК посочи дека карпата може да остане на истото место уште 100 години, но како институција којашто на прво место ја става безбедноста на граѓаните, тој вели дека се должни да ги известат институциите.

– Ги известуваме Министерството за внатрешни работи, Институт за земјотресно инженерство и инженерска сеизмологија, Градежниот факултет од Скопје, каде што има неколку врвни експерти кои работат на ваква проблематика, Геолошкиот завод, Државниот инспекторат за животна средина, Дирекција за заштита и спасување, Град Скопје и Општина Сарај, воедно, ги известуваме и планинарската федерација, но и алпинистичката федерација која го користи овој правец.

Исто така, ја информиравме компанијата која стопанисува со чамците што пловат низ Матка, полни со туристи и препорачуваме да се избегнува местото на предниот дел близу до браната поради оваа многу мала можност на одрон од карпата, вели тој.

Со природата, посочи, никојпат не сме на сигурно. Информациите со коишто располага Центарот покажуваат дека со децении на едни исти места се случуваат одрони на некои од патните правци и оти не се преземени најсоодветни мерки. Како институција тие ќе вршат притисок тие места да бидат обезбедени.

– Затоа сите места на коишто постојано се појавуваат одрони треба многу сериозно да бидат сфатени и да се преземат многу хируршки, темелни зафати со коишто опасноста ќе биде отстранета. Ние не треба да дозволиме некој да загине за да се преземат соодветни мерки.

Но, повторувам, оваа појава трае 50 години не е од сега иако институциите се обидуваат и дејствуваат на тие места. Ние во текот на денот разговаравме и со некои луѓе од страна, покрај нашите институции коишто се должни и имаат обврска да постапат по оваа проблематика ќе воспоставиме комуникации и со некои луѓе од странство коишто имаат потесна специјалност за одрони на карпи, додаде тој.

Во однос на снежните врнежи Ангелов истакна дека во овој момент се проодни правните патци и оти има забрана само на превозот за тешки моторни возила. Во планинските села вообичаено за овој дел од годината патиштата не се проодни, но ќе бидат исчистени во следниот период.

– Ние ги повикуваме сите граѓани коишто се блокирани во некои планински села и коишто се наоѓаат во лоша здравствена или сериозно животозагрозувачка состојба да се јават на бројот 195 ние ќе најдеме начин како да дојдеме до нив и да им помогнеме. Животот и здравјето на граѓаните за нас се на прво место, вели тој.

Директорот на ЦУК додаде дека доколку некој граѓанин во кој било дел на територијата на државата има сериозен животозагрозувачки проблем, ЦУК ќе најде начин како да дојде до него, со навремено информирање.

МИА/Фото: МИА

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

34-годишен Битолчанец загина во сообраќајна несреќа

Редакција

Западен Балкан е преморен од историски недоразбирања, вели Заев

Редакција

Протестен марш за „Јавна соба“: Жртвата никогаш не е виновна, доста беше молк

Редакција