Убавото време ги извади скопјани од дома, па се чини дека цел град е во Градски парк.
Но она што остава впечаток е играта на децата во езерцето, кое е испразнето заради чистење.
Град Скопје на 23 февруари започна со комплетно чистење на каналите и на езерцата во првиот и во вториот дел од Градскиот парк, што не се исчистени околу 10 години.
Акцијата ја спроведуваат екипите на Град Скопје и на јавните претпријатија „Улици и патишта“ и „Паркови и зеленило“.
– Во акцијата се отстрануваат насобраните лисја, милта, наносите од земја и отпадоците, за да може езерцето да се наполни со вода. Се чисти и каналот што носи вода до целиот езерски систем во паркот. Како дел од овие активности се отстрануваат и исушените и искршени гранки на околните дрвја кои претставуваат опасност за посетителите на паркот, појаснуваат од Град Скопје.
Активностите за чистење на каналите и на езерцата во Градскиот парк ќе продолжат и во наредниов период. Од Градот апелираат до граѓаните да не фрлаат отпадоци во каналите и во езерцата и да ја одржуваат хигиената на зелените површини во паркот.