Магазинот „Тајм“ прогласи група новинари за Личност на годината, појаснувајќи дека тоа се „поединци кои се изложиле на голем ризик во потрага по вистина“.
Помеѓу нив е и убиениот саудиски новинар Џамал Кашоги. Во образложението на изборот се наведува дека прогласувањето на Кашоги за личност на годината е признание и за сите „други новинари“.
Кашоги се најде на првото место во изборот, пред американскиот претседател Доналд Трамп и специјалниот обвинител на САД, Роберт Малер, кој раководи со истрагата за руското мешање во американските претседателски избори во 2016 година.
Џамал Кашоги беше новинар на американскиот весник „Вашингтон пост“ и беше познат по своите критички текстови кон саудиските власти. Тој беше убиен на почетокот на октомври во Генералниот конзулат на Саудиска Арабија во Истанбул.
Турските власти, но и најголемиот дел од меѓународната заедница, вклучитечно и САД, за убиството на Кашоги ги обвинуваат властите во Ријад и првенствено саудискиот престолонаследник, принцот Мохамед бин Салман.
Во оваа група на „Тајм“ се најдоа и филипинската новинарка Марија Реса, репортерите на „Ројтерс“ Ва Лоне и Кјав Сое О, кои веќе една година се затворени во Мјанмар, како и весникот „Капитал газете“ од Мериленд, чии шестмина вработени беа убиени во масовното пукање во јуни годинава.
МИА