Претставници од Стопанската комора за туризам на Македонија денеска информираа дека аранжманите за 8 Март за Италија се откажани поради новонастаната ситуација со коронавирусот, а поради паника и страв има обиди за откажување и на аранжманите за другите региони
Туристичките компании немаат конкретни насоки од ресорните министерства како треба да постапуваат во вакви ситуации. Затоа, тие бараат од Министерството за транспорт и врски и авиокомпанијата „Виз ер“ да заземат став за пролонгирање или рефундирање на уплатените средства за авионски карти за Италија со цел да се обештетат патниците.
Тие испратиле дописи до Министерството за здравство, од каде што нема одговор и до Министерство за надворешни работи, од каде што биле контактирани.
„Понудите за регионите зафатени со вирусот се повлечени, но имаме откажувања и за другите региони кои не се зафатени. Стравот и паниката се преголеми кај патниците, но и компаниите се во слична ситуација. Затоа вчера испративме допис и до Министерството за економија од каде побаравме да излезат со став за менаџирање во ваква кризна ситуација во услови на виша сила. До овој момент немаме одговор,“ истакна Билјана Пејовска-Ристовска, извршена директорка на Комората.
Хотелите од Рим не сакале да ги вратат уплатените средства за сместување, што значи дека агенциите самите ќе требале да ги враќаат парите.
„Само за Северна Италија имаме поврат на средства. Бараме барем „Визер“ да ни излезе во пресрет, бидејќи зема субвенции од државата. Двете опции се на маса,“ додаде претседателот на Комората, Емил Димитровски.
ПОВРЗАНИ ВЕСТИ
Уште двајца заболени од коронавирус во Грција, се откажува карневалот во Патра
„Нехар турс“ ги откажa планираните туристички тури во Италија
Фото: cinqueterre.eu.com