Светиот архиерејски синод на Македонската православна црква – Охридска архиепископија (МПЦ-ОА) преку соопштение упати апел до верниот народ да ги почитува мерките пропишани од Министерството за здравство, како и од Светската здравствена организација и апелира во парохиските храмови и во манастирите на МПЦ-ОА во кои има редовни посети и континуиран богослужбен живот, да се зголеми досегашното редовно одржување на хигиената.
Од САС на МПЦ-ОА повикуваат на сострадална љубов и изразување добродетелност на сите оние кои ќе се најдат во борба со оваа болест, најпрво молитвено застапувајќи се пред Бога за нивното здравје и покажувајќи секаква друга можна грижа.
– Надевајќи се на Животодавецот Христос, МПЦ-ОА ја чува вековната вера во светоста на тајните на црквата и својот древен, но секогаш актуелен еклисиолошки став за Лекот на бесмртноста – Св. Причест.
Истовремо потсетуваме дека треба да бидеме силно посветени на борбата со причинителот на болестите и страдањата – отуѓеноста од Бога. Нашата вера е вера во Воскреснатиот Христос, победителот на распадливоста и смртта и Лекарот на нашите души и тела, стои во соопштението.
Бискуп Стојанов: Паросите и монашките заедници во наредните 14 дена да ги прекинат состаноците, активностите и собирите
Во согласност со мерките за заштита од коронавирусот ги повикуваме сите пароси и монашки заедници во државава во наредните 14 дена да ги прекинат веронаучните состаноци и сите форми на активности и собири на деца и млади, се наведува во соопштението од скопскиот бискуп и Струмичко – скопски епарх, Киро Стојанов упатено до свештенството, монаштвото и верниот Божји народ при Скопска бискупија и Епархијата „Струмичко-Скопска Успение на Пресвета Богородица“.
– Соочени со опасни по живот околности од ширењето на коронавирус ширум светот, во Европа и во нашата Татковина и во согласност со упатствата на релевантните државни служби, повикани сме во нашата Католичка црква во Македонија да размислиме како треба да се однесуваме, што треба да правиме од љубов кон ближните и како да им помогнеме на најпотребните.
Следејќи го внимателно развојот на состојбите во нашата земја ги охрабрувам сите верници и граѓани со добра волја да се придржуваат кон одлуките и препораките дадени од надлежните Институции на Владата и одговорно да пристапат кон имплементацијата на објавените мерки, се вели во соопштението.
Да ги претвориме, се посочува, овие мигови на несигурност и неизвесност во време на заедништво и надеж и да не ги заборавиме најранливите групи меѓу нас.
– Доколку одлуките бидат продолжени или дополнети, било од страна на меродавните државни институции било од страна на црковната власт, порачувам да бидат сериозно сфатени и по истите во целост да се постапува. Ве повикувам сите вас, почитувани свештеници, чесни сестри, драги верници, заедно и со доверба да ги упатиме нашите молитви кон Бога – Господарот на животот и историјата.
Вас и сите граѓани на нашата Земја ве доверувам под застапништвото на Блажена Дева Марија Утешителка, како и сите напори за надминување на оваа несекојдневна ситуација. Блажена Дева Маријо, Здравје на болните, моли се за нас, стои во соопштението.
ПОВРЗАНИ ВЕСТИ
„Ако се чуваш ти, ги чуваш и другите“: Твитер реакции за корона вирусот
Кои се симптомите и како да се заштитите од корона вирусот?
(Фото) Информирајте се правилно: Митови и вистини за корона вирусот