Со реакција по објавувањето на нови нелегални снимени разговори за лидерот на ВМРО-ДПМНЕ, Христијан Мицкоски, се огласија исклучените пратеници од партијата, која ја формираа Независната пратеничка група.
ПОВРЗАНИ ВЕСТИ
(Аудио) „Рекет“ со нови „бомби“ со Мицкоски и Кичеец
Ви го пренесуваме нивното обраќање до јавноста:
„Христијан, најверојатно си заборавил кој ти е политички противник, па често ги спомнуваш 8те независни пратеници од ВМРО-ДПМНЕ па, ти се обраќаме:
Како што изминува времето се појасно е кој се борел за правда и правна држава, а кој штител криминал. Разговорите кои јавно се објавуваат меѓу Мицкоски и Милески покажуваат кој гласал во Собрание по сопствено убедување, а кој бил платен и имал лична корист за да го прави тоа.
Сега ни е јасно зошто Мицкоски ни ветуваше: „Со мене ќе ви биде подобро“, а всушност, причината била предметот „Империја“. Очигледно е дека без срам, Мицкоски ги лажеше и нашите сопартијци на кои им велеше дека главниот интерес е да ги заштити нив од прогон.
Но, нам, државата ни беше пред неговите закани и тоа „дали влакно од косата ќе ни фали или не“. Дволичноста и лицемерието на Христијан Мицкоски сега ги слушна и јавноста.
Иако одамна сме разочарани од тоа што и се случува на нашата партија ВМРО-ДПМНЕ, сепак, не очекувавме дека Мицкоски може да оди дотаму, да кочи закони за да штити криминал, со цел, финансиски бенефит. Мицкоски не обвинуваше нас дека сме земале пари да гласаме, а тој се слуша дека само гледа личен интерес.
Јавноста сега се увери дека ние одбивме да постапиме спротивно на интересите на нашата држава и нашиот народ, како што тоа го правеа други наши колеги по нарачка од Мицкоски.
Нели е срамно Мицкоски по митинзи да се фали дека ќе ја врати правдата, која всушност тој сакал да ја продаде за да му плаќаат долгови и автобуси? До кога ќе се лаже и понижува сопствениот народ за лични интереси?!
Заложбата на нашата пратеничка група беше предметите кои ги водеше Специјалното јавно обвинителство за сторен криминал, да добијат судски епилог и да се знае кој е виновен, а кој обвинет без докази. Успеавме во тоа и покрај сите притисоци, но и закани кои ги добивавме во тој период и се присутни и денес, а доаѓаа од мала група на луѓе, по нарачка на ним познати лица.
Носењето на Законот за јавно обвинителство беше нотирано како значаен успех по европскиот пат на нашата татковина. Со него, се елиминираат политичките влијанија, какви што гледаме дека ги имало во минатото. Ние, ја обезбедивме правната држава која Мицкоски сакаше да ја урниса.
Притисоците кои Мицкоски ги правел врз некои од колегите пратеници и за други закони кои биле во собраниска процедура ќе излезат на виделина, бидејќи на лагата и се кратки нозете. ВМРО-ДПМНЕ секогаш имало сила и луѓе со визија, за да ја променат партијата на подобро. Тоа ќе го кажат и тие околу Мицкоски на 15 јули, кога очигледно е дека тој ќе доживее дебакл“.
ПОВРЗАНИ ВЕСТИ
Кои „бомби“ имаат најмногу прегледи, тие за Заев, Мицкоски или Ден Дончев?
(Аудио) „Пукнаа“ две нови „бомби“ за Заев