еМагазин
Image default
Бизнис

Камионџиите преку апликација ќе пријавуваат мито, корупција и криумчарење мигранти

Превозниците со помош на ИТ-апликација ќе можат да пријавуваат мито, корупција, застои и криминални дејства на граничните премини, од класичен шверц до криумчарење мигранти. Притоа ќе останат анонимни и нивниот интегритет ќе биде заштитен.

Ова го предвидува Меморандумот за соработка што го потпишаа денеска владиниот Национален координативен центар за гранично управување и Асоцијацијата на превозници „МАКАМТРАНС“.

Целта на Меморандумот, како што беше речено пред потпишувањето, не е само унапредување на прекуграничното управување, туку и борба со организираниот криминал и корупција.

Информациите за какви било законски недоследности на граничните премини, но и транспортните коридори што ќе ги пријавуваат превозниците, ќе стигнуваат директно до надлежните институции и органите за спроведување на законите.

– Да ја искористиме оваа можност за соработка за што владините институции се подготвени целосно да застанат зад превозниците. Очекуваме нашето партнерство не само да го унапреди прекуграничното управување, туку и да ги намали прекуграничниот криминал и корупција, истакна Националниот координатор за гранично управување, Владимир Пивоваров.

Според министерот за внатрешни работи Оливер Спасовски, Меморандумот всушност ќе биде аларм за преземање мерки во вистинско време, ќе овозможи потесна и кооперативна ефективна соработка за поквалитетна гранична безбедност и проток на стоки и ќе овозможи детектирање и анулирање на сите пречки за безбеден и слободен граничен транспорт.

– На практично ниво ова значи дека состојбите нема само да се следат, туку и конкретно, оперативно ќе се решаваат, потенцира Спасовски.

Билјана Муратовска од „МАКАМТРАНС“ објасни дека превозниците ќе имаат можност да користат  ИТ-апликации за мобилен телефон и за компјутер.

– Транспортерите се секогаш мета на државните органи. Сите ги гледаат како евро или долар, како луѓе кои имаат многу пари. Не може да поминат без некој да им побара 10 евра или 50 евра за побрза царинска постапка, добивање дозвола,…, истакна Муратовска.

Светските искуства покажуваат дека 3,6 милиони смртни случаи се евидентираат годишно во светот поради корупција, а голем е бројот и на несреќи прикриумчарењето мигранти.

– Со системот за пријавување конечно ќе можеме навреме и брзо да докажеме дека ние не сме вклучени во ваквите случувања за кои често знаат да не обвинат, дополни Муратовска.

Во земјава 96 проценти од производството се увезува и извезува преку користење транспорт по патиштата.

МИА

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Продадени два блока од 20.000 акции на Комерцијална банка за 1,9 милиони евра

Редакција

Туристите во Македонија во првиот квартал потрошиле 64,7 милиони долари

Редакција

Стопанска банка Битола планира добивка од 351.000 евра во 2019 година

Никола Осило