Годинава ќе заврши без да биде потребно грчката страна да направи апсолутно никаков чекор, пишува грчкиот весник „Катимерини“ во анализата во пресрет на референдумот кај нас.
Како што јави дописничката на МИА од Атина, весникот коментира дека „референдумот на 30 септември во ПЈРМ за одобрување (или не) на Договорот од Преспа, во Атина се следи со две основни сценарија. Во случај да биде отфрлен договорот, „Катимерини“ пишува дека „Зоран Заев не може да го направи следниот чекор и покрај фактот што референдумот има консултативен карактер“.
Второто сценарио што го анализира весникот е позитивен исход и одобрување на договорот, по што би следел процесот на уставна ревизија, „што може да трае и до три месеци“.
– Врз основа на досегашната негативна позиција на националистичката опозиција ВМРО-ДПМНЕ, не е веројатно дека успехот на референдумот ќе ги премисли пратениците од партијата за да одобрат промена на Уставот. Во овој случај, господинот Заев ќе ја одведе ПЈРМ на предвремени избори со цел да го зголеми парламентарното мнозинство и да го потисне ВМРО. На кусо, 2018 ќе замине без да биде потребно грчката страна да направи апсолутно ништо, пишува „Катимерини“.
Според весникот, меѓународните партнери на Атина, сметаат дека можните предвремени избори во Грција би можеле да го одведат договорот во ќорсокак.
МИА/Фото: Влада на РМ