еМагазин
Image default
Свет

Јужнокореецот Ким Џонг-јанг избран за нов претседател на Интерпол, рускиот кандидат „извиси“

Јужнокореецот Ким Џонг-јанг денеска е избран за нов претседател на Меѓународната полициска организација (Интерпол), како наследник на Кинезот Менг Хонгвеј, кој во септември беше уапсен од страна на кинеските власти под обвинение за примање поткуп.

За изборот на Кина на денешното продолжение на заседанието на Генералното собрание на Интерпол, што се одржува во Дубаи, гласаа повеќе од две третини од членките на Организацијата.

Ким ќе биде на функцијата претседател на Интерпол најмалку до крајот на 2020 година, односно до истекот на мандатот во кој на функцијата беше избран Менг.

Противкандидат на Ким за претседателската функција беше ветеранот на руските безбедносни служби Александар Прокопчук, против чиј избор се изјаснија САД, Велика Британија и неколку други западни земји, со образложение дека доколку тој стане претседател на Интерпол постои опасност за злоупотреба на меѓународниот систем за издавање на „црвени потерници“ од страна на Русија за прогон на политичките противници на Москва.

Прокопчук, кој е генерал на руската полиција, досега беше потпретседател на Интерпол.

Во пресрет на гласањето за избор на новиот претседател на Интерпол, група американски сенатори излегоа со заедничко соопштение, во кое повикаа на „спречување на изборот на Прокопчук“ за прв човек на Организацијата.

Претходно, и американскиот државен секретар Мајк Помпео упати апел до „сите земји членки на Интерпол, кои се залагаат за почитување на правната држава“ да гласаат за избор на Ким за претседател.

Ваквите пораки Москва ги оцени како „отворен притисок и мешање во процесот за избор“ на претседател на Интерпол.

МИА/Фото: news.sky.com

ПОВРЗАНИ ВЕСТИ

Српски медиуми: Македонија гласала за прием на Косово во Интерпол

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

(Видео) Застрашувачки бранови однесоа балкони од станбени комплекси на Тенерифе

Никола Осило

(Видео) Хит во светот: Спикерот во парламентот на Нов Зелaнд хранеше бебе сред седница

Никола Осило

Добитник на Нобеловата награда за мир, за кој беа номинирани и Заев и Ципрас е премиерот на Етиопија

Редакција