Според анализите на бизнис-секторот топ пет најбарани позиции за работа се продажба, возачи, дистрибутери, курири, кадар во угостителство, комерцијалисти и работници во магацин.
По индустрии најбарани се лица за работа во индустрија за малопродажба, угостителство, ИТ, трговија и дистрибуција како и производство.
„Евидентен е недостигот на лица со насочено средно стручно образование, но и на инженери и медицински персонал. Во таа насока неопходна е професионална ориентација на учениците уште во основното образование и промоција на средните стручни училишта и занимања. Потребна е интегрирана соработка на сите општествени чинители за правилно адресирање за потребите од квалификувана работна сила, сето тоа да допре и до учениците и до родителите.
Веруваме дека тоа е единствениот начинот за намалување на јазот помеѓу потребите и понудата на пазарот на трудот“, информираше потпретседателот на Сојузот на Стопански комори, Александар Милошевски.
Тој додаде дека за компанијата да биде попродуктивна и попрофитабилна, покрај технолошката конкурентност, важен сегмент се токму вработените квалитетни кадри, понатаму нивна мотивација и поттик за понатамошна едукација, специјализација за проширување на постоечкото и стекнување на ново знаење со цел што е можно повеќе да придонесат за остварување на организациските цели.