Во анализираната година трошоците на телевизиите кои емитуваат програма на државно ниво преку оператор на јавна електронска комуникациска мрежа, ТВ Компани 21-М, ТВ Шења, ТВ Клан и 1ТВ изнесувале 145,59 милиони денари, а нивното учество во вкупните трошоци на комерцијалните телевизии изнесувало 10,26%, се наведува во Анализата на пазарот на аудио и аудиовизуелни медиумски услуги за 2018 година.
“Најмногу средства потрошила ТВ Компани 21-М (76,58 милиони денари), а најмалку ТВ Клан (13,76 милиони денари). За плати и други надоместоци за вработените овие четири телевизии потрошиле вкупно 61,96 милиони денари.
Највисоки трошоци за плати и други надоместоци за вработените прикажала ТВ Компани 21-М (30,48 милиони денари). Во оваа телевизија биле ангажирани вкупно 82 лица (просечниот број на вработени изнесувал 68 лица, а со договор биле ангажирани уште 14).
Во 1ТВ биле ангажирани само две лица помалку – вкупно 80, од кои 46 во редовен работен однос и 34 со авторски договори. Меѓутоа, трошоците за плати (16,64 милиони денари), биле речиси двојно пониски отколку оние на ТВ Компани-21.
Најмалку средства за платите и другите надоместоци за вработените издвоила ТВ Клан (4,58 милиони денари), но бројот на вработени бил значително помал отколку кај останатите телевизии (25 лица во редовен работен однос и само три со договор)“, стои во анализата.
ПОВРЗАНИ ВЕСТИ
1ТВ и Клан лани во плус, телевизите 21-М и Шења во минус
Колкави приходи од реклами остварила телевизијата 1ТВ лани?