Комерцијална банка АД Скопје реагира на текстот со наслов „Комерцијална банка планира добивка од 31 милион евра и помал број на вработени во 2020 година“ објавен на „еМагазин“ со образложение дека банката не е фокусирана на намалување на бројот на вработени.
Оттаму објаснуваат дека бројот на вработени во Комерцијална банка АД Скопје континуирано се намалува незначителнo и тоа само поради природен одлив (пензионирање).
Во текстот на „еМагазин“ беше пренесена содржината од Програмата на мерки и активности на деловната политика и Финансиски план за 2020 година, објавена преку Македонската берза за хартии од вредност.
Во неа пишува дека: „останатите расходи, кои се состојат од плати и други трошоци на вработените, премии за осигурување на депозитите, материјални трошоци, службени патувања, репрезентации, реклама и пропаганда, амортизација и други расходи, се планирани со намалување од 7,8% во однос на 2019 година, главно како резултат на планиран помал износ на материјални и други трошоци и помал износ на трошоци за плати поради намален број на вработени“.
Имено, во документот никаде не пишува од кои причини се намалува бројот на вработени, ниту пак „еМагазин“ напиша дека банката е фокусирана на намалување на бројот на вработени.
ПОВРЗАНИ ВЕСТИ
Комерцијална банка планира добивка од 31 милион евра и помал број на вработени во 2020 година