еМагазин
Image default
Бизнис

Компаниите не сакаат наметнување за зголемување на минималната плата

Структурните економски реформи се приоритет и стратешка определба на земјата што би ја придвижиле националната економија, рече претседателката на Сојузот на стопански комори на Македонија (ССК), Данела Арсовска на редовна консултстивна средба со мисијата на Меѓународниот монетарен фонд (ММФ) и резидентниот претставник, Себастијан Соса.

Суштината како што рече, е континуитет на реформите, како и овозможување предвидливо деловно опкружување за приватниот сектор како би можеле компаниите со сигурност да креираат повеќе годишни планови и да не се воздржуваат од инвестиции.

Дополнително, како што информираат од ССК, беше дискутирано и за ефектите од најавеното покачување на минималната плата во услови на нестабилна економска состојба во која не е вистинскиот момент за вештачко зголемување на минималната плата со Законот за минимална плата затоа што има голема можност од негативни импликации како што и беше истакнато во најновите извештаи на ММФ, велат од ССК.

„Нашиот став, принципиелно е дека платите треба да се зголемат, но природно, а не со наметнувања кои во турбулентни времиња приватниот сектор тешко може да ги издржи. Истото треба да се спроведе преку национална стартегија која треба да има зацртани цели за подобрување на продуктивноста на приватниот сектор, за обезбедување стабилен пласман на македонски производи, зголемување на бројот на компании кои извезуваат.

Во исто време се соочуваме и со зголемена имиграција на младите и квалификувани кадри на пазарите во Западна Европа што дополнително ќе влијае на притисокот природно да се зголемат платите. Затоа да се наметнува вештачко зголемување на платите во услови на непродуктивност само ќе го зголеми преминувањето во неформалниот сектор“, истакна Арсовска.

Согласно анализите на меѓународните финансиски институции, доколку се прибегне кон зголемување на минимална плата голема е веројатноста дека ќе се зголеми работата на црно на пазарот на труд, велат од ССК.

На состанокот се дискутирало и за неформалната т.е сивата економија, која е еден од најголемите предизвици за сите сектори во стопанството, бидејќи оние кои учествуваат во неа неправично и незаконски ги ставаат во повластена положба оние кои регистрирано работат и ги исполнуваат законските обврски, велат од ССК.

Според последните податоци на меѓународните организации, во земјава секоја година фирмите губат до 15 проценти од профитот поради сивата економија во сите сектори.

Арсовска зборувала и за важноста од владеењето на правото како клучен приоритет за инвестирање на компаниите.

“Беше констатирано дека неопходно е во драфтирањето односно во изготвувањето на регулативата да бидат почитувани оние приниципи кои важат во ЕУ, а тоа е сите засегнати страни да бидат конслултирани додека се подготвува законот и драфтирањето треба да е со широка јавна расправа која ќе трае од шест до девет месеци како би се постигнало изготвување на квалитетно решение кое ќе може да се имплементира во пракса“, велат од ССК.

Како позитивен пример бил посочен новиот предлог-закон за инспекциски надзор на Министерството за информатичко општество и администрација, кој е во собраниска процедура, а со вклучени мислења и препораки од приватниот сектор.

Фото: ССК

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Прилепски Современ дом со намалена добивка

Редакција

Стопанска банка Битола лани со добивка

Редакција

Кои се топ пет најголеми трговски партнери на Македонија?

Редакција