еМагазин
Image default
БЕСПАРИЦА ТОП СТОРИИ

Максималната казна за прекршок на граѓаните се намалува од 1.000 на 250 евра, за нерегистрирано возило од 500 на 250 евра

Во владина процедура влегува Законот за прекршоци кој предвидува намалување на казните од 75 до 150 проценти, најавија денеска на прес-конференција премиерот Зоран Заев и мнинистерката за правда Рената Тренеска Десковска.

-Со новото решение минималната глоба за физичко лице е 15 евра, а максималната ќе биде 250 евра наместо досегашните 1.000 евра. За правните лица при одредување на глобата ќе се води сметка за приходот остварен во претходната година, број на вработени и претходни санкционирања за исти или слични прекршоци.

Во законот првпат се прави градација меѓу малите, средните и големите претпријатија. За малите глобата ќе биде од 50 до 2.000 евра за разлика од претходниот Закон каде изнесува 5.000 евра. За средните и големите претпријатија минимална изречена глоба ќе плаќаат од 250, а максималната 10.000 евра – истакна премиерот Заев и додаде дека со новиот закон, трговец-поединец ќе се третира согласно Законот за трговски лица односно како физичко лице.

Повисоки глоби ќе може да се изрекуваат за прекршоци од областа на даноците, царините, јавните набавки, прекршоци од областа на заштите на здравјето на луѓето, на заштита на природата, животната средина и со ова, како што рече премиерот, се прави јасна дистинкција што е важно, а што е човечно во делот на прекршочната постапка.

Според Заев, глобите се пропорционални на тежината на прекршокот, а казната за прекршок не треба да го отежни животот на граѓаните туку, како што рече, да доведе до кореција на нивното однесување.

Министерката Рената Тренеска Десковска рече дека со новиот закон акцентот се става на опомената.

Намалување на максималната глоба ќе има и за санкционирани нерегистрирани возила повеќе од 30 дена која ќе изнесува 250 евра намесето досегашната 500 евра, за технички неисправно возило 250 евра наместо досегашните 400 и предизвикување бучава ќе се казнува со 250 евра наместо досегашните 450 евра, информираше Тренеска Десковска.

-Станува збор за закон што практично ќе значи решавање на проблемите на граѓаните заради драконските казни со кои се соочуваат и на претпријатијата кои честопати беа непотребно казнувани со превисоки казни и значеа и затворање на некои фирми заради висината на казната, рече Дескоска-Тренеска.

Извршната директорка во Стопанската комора на Македонија Билјана Пеева-Ѓуриќ рече дека Комората од име на бизнис-заедницата до Министерството за правда укажале на потребата на стопанствениците во делот за ревидирање на системот за прекршочни санкции и заедно со повеќе стопанственици биле вклучени во сите подготовки на законот со работната група, за самите да ги слушнат барањата и конкретните проблеми со кои се соочува бизнис-заедницата.

МИА

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Европска комисија: Унгарија сѐ уште не потврдила дека одобрила азил за Груевски

Редакција

Праските од рускиот ќе се префрлаат на британскиот, косовскиот или албанскиот пазар

Редакција

Министерството за правда на привремени вработувања ќе потроши 1,4 милиони денари

Никола Осило