Директорот на Делегацијата на германското стопанство во Македонија, Патрик Мартенс правејќи споредба со платата овде и во Германија истакна дека не е се така како што изгледа, кога ќе се каже дека таму платите се две или три илјади евра.
На неформалната средба со новинарите објасни дека во Германија даноците се повисоки, луѓето сами плаќаат здравствено и социјално осигурување, а киријата во поголемите градови може да ве чини половина од платата.
„Во Германија седум месеци работите за државата, а од август почнувате да работите за себе“, рече Мартенс.
Обидувајќи се да објасни зошто е добро луѓето да останат овде, вели дека доколку би се иселиле би го немале квалитетот на социјалниот живот кој го имаат овде. Потенцираше и дека медицинскиот персонал во Германија, се сели во Швајцарија поради повисоките примања.
„Предноста во Германија е што луѓето имаат доверба во системот, институциите, судството, што пак е недостаток на државите од Западен Балкан. А тоа е основа за економски развој“, додаде Мартенс.