еМагазин
Image default
Македонија

Мицотакис два и пол часа одговараше на новинарски прашања: Засега не е предвидена средба со Заев

Се уште не е предвидена некоја средба со господинот Заев, но очигледно е дека во некој момент ќе се сретнам со господинот Заев, рече грчкиот премиер Кирјакос Мицотакис, одговарајќи на новинарско прашање за време на денешната прес конференција во рамките на Меѓународниот саем во Солун.

Едно од прашањата упатени до претседателот на владата на Грција, се однесуваше на Договорот од Преспа, а Мицотакис освен што го повтори ставот на Нова демократија и додека беше опозиција, дека е „национално штетен договор“, рече дека истото го кажал и за време на сите негови меѓународни средби, но и додавајќи дека „овој договор е ратификуван договор од грчкиот Парламент, а според тоа не се менува произволно“ и најави строга контрола на процесот на спроведување.

„Реков дека ако договорот се изгласа и ратификува, тогаш многу многу тешко може да се смени. Самиот договор не предвидува процеси на промени, туку само контрола на спроведувањето. Бидете апсолутно сигурни дека ќе бидеме многу строги во однос на спроведувањето на договорот, кој го сметаме за лош, но го најдовме пред нас, го наследивме“, рече Мицотакис одговарајќи на новинарското прашање.

Грчкиот премиер го повтори и она што го кажа синоќа во неговиот говор дека е потребна „заштита на македонските производи“ и „поддршка на брендот Македонија“, а ја спомена и комуникациската кампања на глобално ниво.

„Кога некој слуша Македонија, да мисли на нашата Македонија, на вистинската Македонија, на автентичната Македонија. Ова не е нешто што се одредува од договорот, тоа е нешто што се однесува на нас и нашите можности да ги поддржиме нашата историја и нашето културно наследство. И ова, да немате никаков сомнеж, дека ќе го сториме“, истакна грчкиот премиер.

Прес конференцијата во рамките на Меѓународниот саем во Солун, традиционално се одржува секоја година, а премиерот на Грција одговара на прашањата на новинари од медиуми од целата земја.

Денешната прес конференција траеше над два и пол часа, а Мицотакис одговори на над 50 прашања, поврзани со економијата, даночната политика, примарниот суфицит, владината програма, бегалскиот/мигрантскиот проблем, односите со Турција и Албанија, но и за Договорот од Преспа и евентуалната средба со премиерот Зоран Заев.

МИА/Фото/Фејсбук/Мицотакис

ПОВРЗАНИ ВЕСТИ

Династијата Мицотакис цел век ја ткае историјата на Грција

Запознајте ја сопругата на Мицотакис, новиот грчки премиер

По победата на Мицотакис: Доаѓа ли време на заладување на грчко-македонските односи?

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Расправа за уставните измени: Се бараше чаре за потписот на претседателот Ѓорѓе Иванов

Никола Осило

Ќе се утврдува одговорноста на полицајците кои не постапувале за време на полицискиот час во Чаир

Редакција

Уписите во основните и средните училишта во јуни, на факултетите во август и септември

Редакција