Директорот на МЕПСО, Куштрим Рамадани, во интервју за Телма, вели дека потрошувачката е поголема од производството на електрична енергија, а набавка од добавувачите нема поради поскапените цени на берзата.
“Минатите денови имаме забележано дека производството плус увозот не е во баланс со потрошувачката. Тоа значи просто дека ние имаме недостаток на електрична енергија.
Според нашите првични извештаи, оти ние производството го следиме онлајн, значи 24 часа, кога ги споредуваме колку е производството, увозот и потрошувачката, можеме да заклучиме дека најголемите отстапувања се случуваат токму поради ЕСМ. Значи имаме намалено производство на електричната енергија“, вели Рамадани, кој не исклучува ни рестрикции.
“Ризикот е голем и затоа пак велам дека треба да видиме ние кои реални капацитети ги имаме за производство. Таа количина на енергија што ни фали да ја набавиме и тука е клучот, тука е решението.
Нема друга алтернатива или рестрикции, ама рестрикците во 21-иот век, во 2021-ва година никој не би ги посакувал, така да предлогот е тие количини што ни фалат, да ги набавиме на слободен пазар и тоа е тоа“, вели тој и потврдува дека МЕПСО за еден месец ќе плати 15 милиони евра поради недозволеното преземање од европската мрежа.