еМагазин
Image default
Македонија ТОП СТОРИИ

Нова распределба на квоти по аптеките: Поголема достапност на лекови во текот на целиот месец

Фондот за здравствено осигурување во интерес на своите осигуреници, но и во интерес на аптеките, утврди нова распределба на квотите за лекови за аптеките со кои Фондот има склучен договор, информираат од таму.

Новата распределба стапува на сила од 01.01.2019 година.

„Со тоа, најголемиот број од аптеките, односно околу 500 аптеки од вкупно 778 аптеки со кои Фондот има склучен договор, од 01.01.2019 година ќе добијат рамномерно зголемување на квотите за околу 20.000 денари месечно по аптека. Сакаме да нагласиме дека сега со новата распределба сите аптеки добиваат фер услови за обезбедување на лекови на целата територијата на Република Македонија, што не беше случај претходно, бидејќи заради начинот на распределба на квотите во претходните години настанале и големи разлики во висината на износите на квотите на аптеките, а едно правно лице добивало и за 40 насто поголема месечна квота од просечната квота на сите останати аптеки во Република Македонија“, се вели во соопштението на Фондот.

Од таму додаваат дека сега нашите осигурениците ќе имаат подобра достапност до лековите во текот на целиот месец во аптеките во близина на нивното место на живеење.

Новите квоти се донесени после исцрпни анализи на дистрибуцијата на квотите на аптеките и во консултации на Фондот со Фармацевтската комора на Македонија, Сојузот на стопански комори и Здружението на приватни аптеки.

„Предвиден е минимален износ по глава на жител, односно по осигуреник, по подрачна едниница на Фондот, насекаде во државава. Целта е во наредните две до три години да ги изедначиме буџетите по подрачна едниница мерено по глава на жител кои досега во некои случаи покажуваа значителни разлики. За аптеките се утврдува максимален износ на квота од 650 000 денари по аптека.
Со новата распределба едно правно лице со две или повеќе аптеки не може да има вкупна квота која е поголема од 10 проценти од вкупниот месечен буџет на Фондот наменет за лекови на рецепт на ниво на цела држава. Досега само едно правно лице располагаше дури со приближно 20 проценти од буџетот за лекови на товар на Фондот. Со овој потег се намалува можноста за стекнување и одржување доминантна позиција на пазарот и се подобрува конкуренцијата, а на средните и малите аптеки им се овозможува порамноправни правила на игра“, се додава во соопштението.

Во интерес на граѓаните, Фондот ги поттикнува аптеките да издаваат повеќе лекови без доплата, односно аптеките со квотите треба да издаваат наjмалку 20 проценти лекови за кои осигурениците не треба да доплаќаат од нивните лични финансии освен задолжителната партиципација.

„За граѓаните да не бидат препраќани од аптека во аптека, воведовме можност едно правно лице со повеќе аптеки да може да ја искористува квотата во сите негови аптеки во ист град, односно подрачна единица на Фондот. Два пати годишно ќе се врши порамнување на квотите, во јули и во декември во календарската година. За да нема тактизирање од аптеките, се воведува фиксна маржа од вкупната месечна квота по аптека.

Со тоа се укинува досегашниот скалест систем кој ги дестимулираше аптеките да издаваат поскап лек, а ги стимулираше да издаваат лекови со пониска вредност.

Во интерес на граѓаните кои живеат во тешко достапни и поодалечени села, Фондот воведува и можност за субвенција на аптеките кои што обезбедуваат лекови за тамошните жители, како директна поддршка за опстојување на аптеките и во такви места, што е од општествен и јавен здравствен интерес“, додаваат од ФЗОМ.

Дополнително, во почетокот на 2019 година, Фондот ќе распредели дополнителни, најмалку околу 120 милиони денари за лекови на товар на Фондот, со што ќе го зголемиме вкупниот буџет за лекови од 2 милијарди и 900 милиони денари за 2018 на најмалку три милијарди и дваесет милиони денари. Ова значи дека секоја аптека во просек може да очекува повторно зголемување на месечната квота за нови, дополнителни 20.000 денари во почетокот на Новата 2019 година.

Промените во однос на квотите, ги најави и министерот за здравство Венко Филипче во интервју за еМагазин.

Фото: ФЗОМ

ПОВРЗАНИ ВЕСТИ

Филипче: Треба време за граѓаните да ја вратат довербата во здравството

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

ВМРО-ДПМНЕ продолжува со консултации за референдумот

Редакција

Топ пет највисоки просечни плати: Програмерите со 76.223 денари убедливо на врвот

Редакција

Вања била врзана и изнесена од зградата преку подрумите во зградата каде живееше?

Редакција