еМагазин
Image default
Локално

Охрид полн со гости во пресрет на продолжениот празничен викенд

Продолжениот празничен викенд веќе по правило го означува шпицот на летната туристичка сезона во Охрид и на охридското крајбрежје.

Хотелските сместувачки капацитети и претходно беа исполнети со гости, благодарение на аранжманите склучени со странските тур-оператори, така што кај нив посетеноста е одлична.

Кога станува збор за приватното сместување, апартманите, студијата и собите во центарот на градот се веќе закупени за празниците така што сместување е тешко да се најде за престојните денови на викендот. Слободни легла има, но пред се во капацитетите надвор од централното градско подрачје.

Секако бројни ќе бидат и нашите граѓани кои живеат по другите градови, а имаат свои станови во градот, па како и секоја година во овој период од сезоната Охрид ќе биде полн со гости.

Редовно за Илинденските празници посетеноста на Охрид значи и богата кутурно-забавна понуда, со содржини за сите вкусови и генерации. Покрај редовната програма на „Охридско лето“ која по правило за празникот и за роденденот на фестивалот 4 август нуди издвоени содржини, како гостувањето на рускиот театар „Караганда“ со претставата „Сон на летната ноќ“ на Шекспир на 2 август и концертот на дуото Влатко Стефановски и Мирослав Тадиќ на 4 август.

Одлична посетеност најавија и организаторите на концертите во рамки на „Ohrid calling“ што ќе се одржува наредните четири дена, во чии рамки ќе настапат бројни врвни имиња од светската електронска забавна сцена како Стив Аоки, Маркус Шулц, Нерво, Вини Вичи, Сунери Џејмс, Рајан Марчиано и многу други.

Според продажбата на билетите, се очекува во Охрид само за концертите на „Ohrid calling“ да присуствуваат околу 50 илјади посетители, од кои пет илјади гости од странство што ќе дојдат тука само заради богатата програмска понуда.

Охридските клубови исто така предвидуваат и бројни гостувања на познати имиња од естрадата, како домашна така и од регионот. Тука се концертите на „Некст тајм“, Жељко Јоксимовиќ, забавата на зајдисонце на 3 август во рамки на првото издание на „Аманет“ фестивалот и многу други забавни содржини.

И временската прогноза за деновите на празничниот викенд во прилог на очекувањата градот и крабјрежјето на Охридското Езеро да бидат полни со гости.

МИА

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Скопјанец бегал од полицијата со камионче во кое превезувал 48 мигранти

Никола Осило

Кривична пријава против дилер на хероин од Штип: Го издал муштерија

Никола Осило

Двајца скопјани се степале во аптека на „Партизанска“

Никола Осило