Основното јавно обвинителство за гонење на организиран криминал и корупција денеска го поднесе обвинението за случајот „Рекет“, во кое се обвинуваат три лица.
„До Основниот кривичен суд е поднесен Обвинителен акт против три лица, македонски државјани. Две од обвинетите лица се теретат дека сториле кривично дело „примање награда за противзаконито влијание“, a на првообвинетиот му се става на товар и кривично дело „перење пари и други приноси од казниво дело“.
Второобвинетото лице се терети дека сторило кривично дело „злоупотреба на службена положба и овластување“, стои во соопштението на ЈОРМ .
Според Обвинението, првообвинетиот Бојан Јовановски – Боки 13, од лани во ноември до април годинава, влијаел на второобвинетата Катица Јанева да ја олесни положбата на притворениот сведок Орце Камчев, кој во предметот „Империја“ е еден од осомничените.
Третообвинетиот Зоран Милески – Кичеец ги договарал средбите на Јовановски со сопругата на Камчев, а подоцна и со Камчев, уверувајќи ги во неговото влијание врз тогаш специјалната јавна обвинителка Јанева.
Откако Јовановски и Милески ги добиле договорените 500.000 евра од сопругата на Камчев, Јанева доставила предлог за куќен притвор за Камчев, што Судот го прифатил, а по исплатата на првите 1.000.000 евра, Јанева дала писмена согласност за времено враќање на пасошот на Камчев.
Јанева при тоа, велат од ЈОРМ, за себе прибавила имотна корист – мебел од 296.040 денари и пари во износ од 50.000 евра, а за противзаконито влијание другите двајца обвинети примиле награда од 1.500.000 евра.
Покрај обвинение, Обвинителството поднело и барање за продолжување на мерките за обвинетите.
ПОВРАЗНИ ВЕСТИ
И такото на Боки 13, Миле Јовановски, не чувствува вина за „Рекет“
Обвинението за „Рекет“ открива како ги трошел парите: Боки 13 бил невработен, а живеел луксузно
Најдени сите пари „изрекетирани“ во “Рекет“?
Фото: Боки 13/Инстаграм