Лавина реакции во јавноста предизвика најавата од Македонската православна црква дека ќе има причест во црквите и дека како вообичаено ќе се користи исто лажиче за сите верници.
Реакциите се оправдани ако се земе предвид дека има вонредна состојба во нашата земја и дека одржувањето на овој црковен чин во пресрет на големиот празник Велигден е закана за населението и свештенството поради ризикот од ширење на корона вирусот.
Иако е добро е што црквата и нејзините претставници упатија апел до верниците да ги почитуваат препораките на Владата за корона вирусот прашање е колку тие ќе покажат свест за опасноста од оваа зараза и дали ќе ги послушаат нивните апели.
Уште поголема е дилемата какво фајде од неколкудневниот полициски час за Велигден кога денес во пресрет на големиот празник верниците може да ги преплават црквите.
Факт е дека голем дел од населението се уште ноншалатно се однесува кон заканата од корона вирусот за што доказ се секојдневните приведувања поради прекршување на полицискиот час.
Од МПЦ веќе порачаа дека на големиот празник би било убаво верниците да запалат свеќа на балконите и на полноќ да го одбележат Христовото воскреснување.
Станува збор за убава можност во македонските градови прв пат Велигден да се одбележи на овој начин со прекрасна глетка и чувство на заедништво и покрај дистанцирањето и големата закана по колективното здравје.
Затоа, верниците денес и утре треба да останат дома, ќе има подобри времиња кога славењето на големиот празник ќе се врати во верските храмови.
ПОВРЗАНИ ВЕСТИ
Ќе ја „оплескаме“ ли со коронавирусот за Велигден?
МПЦ пред Велигден повика да се почитуваат мерките за превенција од коронавирусот