еМагазин
Image default
Македонија

Што порачаа за Денот на независноста премиерот Заев и претседателот Пендаровски?

Денот на независноста ни покажа дека слободата и самостојноста ги имаат најубавите бои, напиша на својот Фејсбук профил премиерот Зоран Заев.

„На 8 септември 1991 година, Денот на независноста ни покажа дека слободата и самостојноста ги имаат најубавите бои. Дека радоста, среќата и убавината што ја преплавија тогаш нашата татковина треба да ги паметиме и да ги носиме со нас секогаш кога ќе се соочуваме со искушенија и опструкции на нашиот пат. Тоа се нашите бои, боите на независноста и на слободата.

Така се слави Денот на независноста. Нека е вечен Денот на независноста. Да живее Република Северна Македонија“, напиша премиерот Заев.

Претседателот Стево Пендаровски потсети дека во 1991-та во неизвесно време граѓаните се обединиле околу идејата за своја, независна држава.

„Тогаш, големиот предизвик, наместо причина за поделби, стана повод за обединување, сите се собравме околу идејата за независна и суверена Македонија“, вели претседателот во честитката упатена до граѓаните по повод 8 Септември, Денот на независноста.

Низ годините, како што посочува претседателот, имавме и подеми и падови, и грешки и успеси, но, заедно, ги надминавме сите искушенија.

„Во 1991-та одбравме независност, во 2001-та меѓуетнички соживот. Денес сме пред портите на европските и евроатлантските институции. За да стигнеме до целта, треба повторно да го обновиме единството што го имавме на почетокот на независноста. За тоа ни е неопходно граѓанско помирување, а за трајно помирување потребна е ефикасна правда и државни институции со интегритет“, вели Пендаровски.

Ако сакаме младите генерации да останат во земјата и тука да живеат, да работат и да создаваат иднина, како што истакнува претседателот, мора да се потрудиме многу повеќе како држава и да им обезбедиме услови да се реализираат и да успеат дома, во својата земја.

Говорејќи за различностите, Пендаровски истакнува дека токму нашата различност е нашата привилегија.

„Колку поразлични сме, толку побогат и поубав ќе биде нашиот заеднички дом. Да градиме заеднички држава во која сигурно има место за сите нас, да градиме општество ослободено од предрасуди.

Држава и општество во која има продуктивен политички дијалог, социјална правда, солидарност кон ранливите и заборавените, во која и државата и граѓаните се грижат за животната средина. Држава во која владее правото, во која истите правила важат за сите нас, и за силните и за слабите, и за моќните и за немоќните, и за власта, и за опозицијата.

Држава во која ќе се признаваат грешките и ќе се честитаат успесите. Само таква држава ќе има сигурна и просперитетна иднина“, нагласува шефот на државата во честитката.

ПОВРЗАНИ ВЕСТИ

Мицкоски од Кораб, а Груевски со сеќавање на студентските денови го честитаа Денот на независноста

Фото: Фејсбук/Зоран Заев

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

„Цивил“: Бранко Црвенковски избришан од избирачкиот список

Никола Осило

Се чека до еден час за влез во Бугарија

Редакција

Русковска: Загрозениот сведок рече дека Никола Груевски бил организаторот на упадот во Собрание

Редакција