еМагазин
Image default
Македонија

Спасовски: Доколку има нови моменти во истрагата за атентатот врз Глигоров веднаш ќе се споделат со јавноста

Доколку има нови моменти во истрагата за атентатот врз првиот претседател на Република Македонија Киро Глигоров тие ќе се споделат со јавноста, изјави денеска министерот за внатрешни работи Оливер Сласовски, на денот кога пред 23 години се случи овој терористички атак.

– За сите работи, и за оваа, ако имаме нови сознанија ние ги споделуваме со јавноста, во духот на транспарентноста. Се што ќе има ќе се објави, не само за атентатот. Тоа е нешто што денеска не потсетува на тој ден и за други активности кои ги презема Министерството за внатрешни работи, рече Спасовски, одговарајќи на новинарско прашање по отворањето на регионалниот семинар „Превенција/борба против насилен екстремизам“.

Пред 23 години на 3 октомври беше извршен атентат врз првиот претседател на Република Македонија Киро Глигоров, кој го преживеа со тешки повреди во главата.

На местото на атентатот загина неговиот возач Александар Спировски, а беше повреден телохранителот на Глигоров, Илчо Теовски. Како последица од повредите почина и случајниот минувач Христо Христоманов, а беа повредени и Климе Коробар и Јован Атанасовски.

Останува непознато кој стоел зад атентатот. Истражната постапка која се води против непознат сторител се уште е отворена. Истрагата утврди дека атентатот бил добро подготвен и организиран и оти само среќна околност е што претседателот Глигоров го преживеа атентатот.

Нападот беше извршен со автомобил-бомба на 3 октомври 1995 година во 9:50 часот на улицата „Македонија“ пред хотелот „Бристол“ во Скопје кога Глигоров со службено возило се движеше од неговата резиденција на работното место во Собранието на Република Македонија.

Во автомобил „цитроен ами 8“ биле скриени 20 килограми експлозив, кој бил активиран со далечински управувач кога возилото на Глигоров се движеше кон зградата на Собранието. Пред експлозијата службеното возило на претседателот на улицата „Македонија“ го забавило едно „фиќо“.

Во истрагата биле претресени 30.850 возила и прегледани повеќе од 15.000 објекти, легитимирани биле повеќе од 188.000 лица, од кои 19.000 биле претресени. МВР извршило и повеќе информативни разговори со луѓе за кои сметало дека се можни сторители на атентатот, но сите тие биле пуштени по испрашувањата.

Киро Глигоров почина на 1 јануари 2012 година на 94 години.

МИА/Фото: МВР

ПОВРЗАНИ ВЕСТИ

Подзаборавено интервју: Киро Глигоров за спорот за името

Дали Глигоров ги знаеше атентаторите?

(ВИДЕО) Кој сакаше да го убие Киро Глигоров

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Орхан Адеми избран за заменик на главниот државен ревизор

Редакција

222 здравствени работници во Македонија заболени со коронавирусот, 37 оздравени

Редакција

Убава вест: Оздравени 347 болни од Ковид-19

Редакција