Додека официјално се тврди дека избеганиот поранешен македонски премиер Никола Груевски е во Будимпешта, во некои написи се шпекулира и дека отпатувал во Русија или во Турција, пишува денеска српскиот провладин дневен весник „Политика“, пренесува meta.mk.
Во написот се потенцира дека и Русија и Турција одржуваат дипломатски односи со Скопје, но се судираат околу прозападната политика што ја спроведува премиерот Зоран Заев.
Под наслов „Груевски ги раскарува Америка и Русија“, најстариот дневен весник во Србија пишува дека „Русија никако не го прифаќа приклучувањето на Македонија во НАТО, а Турција не се слага што Македонија потклекнала пред грчкото барање за промена на името на државата“.
„Политика“ оценува и дека на Заев ќе му бидат потребни „многу, не само политички, туку и правни докази, за на народот и на меѓународната јавност, посебно на Исток, да им објасни дека Груевски не е политичка жртва на ,црвеното американско владеење во Скопје’, како што тврди ВМРО-ДПМНЕ, туку дека избегал кога требало да оди в затвор“.
„Заев моментално е единствениот оптимист дека Груевски ќе биде вратен во Македонија. Останува отворено прашањето, ако навистина е во Русија, како Заев ќе го добие, а ако е во Будимпешта, тогаш премиерот Виктор Орбан сосема сигурно е во политички незгодна ситуација во однос на Русија, а правно и политички во однос на ЕУ“, заклучува „Политика“.
ПОВРЗАНИ ВЕСТИ
Зошто на Груевски кој нелегално влегол во Албанија, му било дозволено да излезе со лична карта
Прашање за милион долари: Како и кој му помогна на Груевски да избега од Македонија
На крај Груевски на Фејсбук ќе ни раскаже како избегал
Мета/Фото: Груевски/Фејсбук