Претседателот на српскиот парламентарен одбор за Косово и Метохија, Милован Дрецун во интервју за српски „Курир“ тврди дека силен разузнавачки тим формиран пред два месеца работи на блокирање на компромисно решение меѓу Белград и Приштина.
Според него, тимот го сочинуваат разузнавачи од Бугарија, Албанија, Македонија и Германијa, а е „маскиран“ во авто-салон во Скопје.
“Се води јака кампања во некои соседни држави против постигнувањето било какво компромисно решение, Македонија станува центар за силно разузнавачко дејствување против интересите на Србија. Секое постигнување компромисно решение е темелен столб за стабилизација на овој регион, а непостигнување компромис меѓу Белград и Приштина е подготовка за нови судири во регионот и создавање „Голема Албанија““, тврди Дрецун во интервјуто за Курир.
Тој смета дека нивната цел е да ѝ наштетат на Србија.
“Што можат тие да работат освен да собираат информации и да шират дезинформации. Тимот не е формиран да ги штити нашите интереси, туку да работи спротивно од нив. Тоа не е наивно, можат да изведат некоја медиумска или политичка диверзија, дури и да предизвикаат судир“, вели тој.