еМагазин
Image default
БАШ НИ Е ЌЕФ ТОП СТОРИИ

Триумф на „Медена земја“ во Русија

Документарецот „Медена земја“ (Honeyland) го продолжува својот успешен поход на светските филмски фестивали. Деновиве триумфира на два фестивала во Русија. Ги освои наградите за најдобар дебитантски филм и за најдобар филм за животна средина на Интернационалниот филмски фестивал „Порака до човештвото“ во Санкт Петербург, како и гран-при за најдобар филм на интернационалниот филмски фестивал „Човек и природа“ во Иркутск, Сибир.

Режисерите Љубомир Стефанов и Тамара Котевска деновиве по првпат имаа можност да го претстават филмот во двете крајни точки на Русија: од Балтичкото Море (на запад) во Санкт Петербург, па сѐ до далечниот сибирски исток на Бајкалското Езеро. Оттаму, македонските филмаџии беа испратени со најпрестижните награди.

На најстариот фестивал за документарен филм во Русија, „Порака до човештвото“, што се одржува на „Плоштадот на палатата“ (каде што секоја година има околу 40.000 гледачи), „Медена земја“ имаше две свечени проекции.

Стефанов и Котевска во своето обраќање нагласија дека имаат голема чест што присуствуваат на филмски фестивал чијшто приоритет е пораката што ќе ја испратат до човештвото и дека тие се надеваат оти со својот филм го постигнале токму тоа: испратиле едноставна и моќна порака што се однесува на луѓето од целиот свет. Токму затоа им беше врачен „Кентаурот“ – симболот на фестивалот.

Од Санкт Петербург си заминаа и со наградата за најдобар филм за животна средина – Bellona Environmental Law Organization’s prize.Дополнително, во Музејот на матрјошките, во чест на „Медена земја“ гордо е истакната и матрјошката од главната хероина на документарецот – Атиџе.

Филмот паралелно го имаше своето прикажување и во централна Русија, на филмскиот фестивалот „Флахертијана“ во Перм.

По ова, следуваше гостување на екипата на „Медена земја“ во сибирски исток на Бајкалското Езеро, на 18. издание на „Човек и природа“ – фестивалот што го нарекуваат и руски пандан на „Оскар“. Филмот се закити со статуетка од „реката АНГАРА, ќерката на БАЈКАЛ“ инспирирана од старата легенда за Бајкалското Езеро.

Впрочем, фестивалот „Природа и човек“ се одржува токму во мистичната област на бајкалскиот народот „бурјаци“ и нивната чудесна шаманска култура, чијшто приоритет е задржување на врската со природата. Токму она што главната хероина на „Медена земја“, Атиџе, се обидува да го постигне. Впрочем, изненадувачка за авторите беше сличноста на тој народ со Атиџе во начинот на живеење и верување.

Токму затоа, тие велат дека оваа награда им е особено значајна и се особено почестени да го добијат признанието за пораката што ја носи нивното дело токму од народот кој сè уште живее според таквите вредности.

По Сибир, авторите замина во Лос Анџелес, САД, каде што ја продолжуваат промотивната кампања на филмот во трката за „Оскар“.

„Медена земја“, што по триумфот на престижниот фестивал „Санденс“, на светските фестивали се стекна со околу 20 главни награди, е годинешен македонски кандидат за „Оскар“ и е во трка за најдобар документарец на „Европските филмски награди“.

Филмот, што изминативе месеци се прикажува на повеќе фестивали и во киносалите од САД до Нов Зеланд, од денеска (27.09.2019), освен во Скопје, ќе има кинодистрибуција во повеќе градови во Македонија: Кратово, Штип, Крива Паланка, Струга, Битола, Куманово, Свети Николе и Охрид, а наскоро ќе има објава и за други проекции.

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Петар Заборски од „Макпетрол” освои бронза на светската карате лига во Атина

Редакција

Детален преглед: Кој и како може да аплицира за државна помош од 14.500 денари по вработен?

Редакција

Детален преглед: Кои фирми земале државна помош во ноември, а не исплатиле плати

Редакција