Говорот на омраза е навлезен во секоја клетка на општеството, а освен на социјалните мрежи каде што е најчест, станува дел и од нашето секојдневие.
Последен пример за тоа е муралот во Битола кој пренесува порака за солидарност и заедништво. Имено, за неполни 24 часа од неговата промоција, истиот е уништен со пораки на говор на омраза.
„АКТО и Народен Театар Битола како и пошироката локална и национална уметничка заедница на огромно задоволство ги прими колегите од колективот КУРС од Белград да работат во нашиот град и да пренесуваат пораки на заедништво, солидарност и пркос кон национализмот и ксенофобијата.
За жал, сведоци сме дека општеството се уште е загадено со национализам и нетрпеливост кон различностите. Ги повикуваме надлежните да ги пронајдат сторителите на овој вандалски чин. Ние ќе продолжиме да се бориме за праведно општество за сите. Борбата за вредности продолжува,“ велат од Акто фестивалот.
Фото: Фејсбук/Акто/Општина Битола