Седмиот по ред Викенд на гордоста Скопје, фестивал за квир-култура и уметност, почнува вечерва во Музејот на современа уметност, од 21 часот.
Овогодишниот Викенд на гордоста се отвора со перформансот на Рон Ејти — Акефално чудовиште, култен уметник кој во последните 40 години направи тектонски поместувања со неговите перформанси во рамки на изведувачките уметности и body arts.
„Носечката идеја зад Викендот на гордоста 2019 е Glittering wounds (светкави рани). Со оваа идеја сакаме да ги истражиме и да ги проблематизираме современите хегемониски политички имагинации и практики на изолираниот, посесивен, децизионистички, приватизиран, рационален и самодостатен субјект, и нивната испреплетеност и конститутивна зависност од нормативните рамки и репрезентации на родот, сексуалноста, расата, класата и неолибералната капиталистичка идеологија.
Од друга страна, целта ни е да презентираме и да ги промовираме различни нехегемониски светоградечки проекти и историските, социјални и политички проживеани искуства на “настраните” и жените, како извори на алтернативни социјални и демократски хоризонти засновани на релационоста, солидарноста, грижата, афективноста и трансформативноста, отаде идентитетската препознатливост“, велат организаторите.
Во рамки на фестивалот публиката ќе има прилика да се запознае со некои од најзначајните совремни уметници, и да проследи перформанси на Boychild, Рејчел Јанг и Марикискрајкрајкра, промоција на постхумно издадениот превод на Огнен Чемерски на книгата “Како да се биде геј” на еден од основоположниците на квир теоријата – Дејвид Халперин, изложба на Дел Лагрејс Волкано, спектакуларно дрег шоу на 12 кралици од Берлин, Белград и Скопје, како и традиционалното Срамота на ПичПрич.
Викендот на гордоста Скопје оваа година се одржува во периодот 7-9 јуни и 14-15 јуни.
Деталната програма на фестивалот може да ја проследите на: coalition.org.mk.