Братот на премиерот Зоран Заев, Вице Заев се појави денеска во Основниот суд Скопје 2, на рочиштето за предметот во кој го тужи потпреседателот на ВМРО-ДПМНЕ, Александар Николовски за навреда и клевета изречени во дебатна телевизиска емисија.
Вице Заев негира дека е сопственик на компанијата за производството на канабис за медицински потреби „Еленица“, освен дека порано бил член на нејзиниот Надзорен или Управен одбор, а со производството на канабис за медицински потреби немал допирни точки.
„Членови на моето пошироко семејство, мои први братучеди, да. Јас не. Јас сум сопственик на фирмите „Тотал инженеринг“ и „Тотал електрик“. Сте можеле сè ова да го проверите, а за парцелата за градба, ако Ви било нешто сомнително, сте можеле да пријавите во обвинителството. Немате право да ме клеветите и навредувате“, му кажа Заев на тужениот Николовски.
Заев во тужбата навел дека: „тој е чесен човек и успешен бизнисмен со висок углед во средината во која живее и работи„ и дека: „ваквите изјави кај него резултирале со чувство на вознемиреност, напнатост и намалено расположение, пропратено со вегетативна симптоматологија, потење и црвенило на лице кое нешто предизвикало силна душевна болка кај него“.
Според Николовски пак, Заев потврдил дека тој лично, и неговото потесно и пошироко семејство е дел од бизнисот со одгледување на медицинска марихуана.
„Потврди дека е дел од градежниот бизнис, и исто така, потврди дека неговите компании имаат раст во изминатите години, што мене ми дава право да заклучам дека станува главен бизнис-фактор во државата“, рече Николовски.
Следното рочиште е закажано на 12 април.
ПОВРЗАНИ ВЕСТИ