Мартин Цветковски на социјалните мрежи сподели видео во кое се гледа дека двајца мажи, буквално се изживуваат врз бабичката која секој ден седи пред „Солета“ на Партизанска – карши пазарот „Буњаковец“ која продава малини, бадеми, лешници , ореви, и било што само за да заработи некој денар.
„Кој живее во близина, работи и поминува не може да не ја забележал и запамтил тој мил глас кој довикува „Ајде малини, бадеми, тазе лешници“ само за да продаде и да заработи некој денар.
Епа ова суштество во црната јакна (не знам дали беше инспектор од негде) заедно со неговиот колега во кафената јакна од страна (кој само се смееше и исмејуваше на ситуацијата), најпрвин зема и ја преврте гајбата со робата, и ја истури од торбата на женичката целата роба, (момент кој не успеав да го фатам додека уклучам камера), дерејќи и се со секакви погрдни зборови се со цел да привлече повеќе внимание на сметка на омаловажување на оваа мирна бабичка.
Откако бабичката ги собра повторно кесите, истиот зема ги искина кесите и и ги истури бадемите на целиот тротоар, а женичката зрно по зрно ги собираше.
Не би сакал повеќе да објаснувам погледнете го видеото и ќе ви стане јасно за што зборувам….
Можеби законски не е дозволено да се продава на ваков начин…. но нејзините раце се едни од најчесните и најчистите раце. Во државава краде кој стигне, а некои вакви комплексирани службеничиња од 120 килограми ќе лечат комплекси и сила над вакви женички и бабички.
Само едно прашање ме интересира. Дали ваков начин на „храброст“ и „сила“ би демонстрирал на Зелен пазар, Шутка а камоли Бит Пазар“, прашува Мартин.
По објавувањето на видеото, од Општина Центар се извинија со соопштение за инцидентот кај ТЦ „Буњаковец“.
„Општина Центар се извинува за грубото и нехумано однесување на двајцата комунални редари вработени во Секоторот за инспекциски работи во општината. Нивното однесување денеска со право ја вознемири и револтираше јавноста.
Општина Центар ќе ги преземе сите неопходни мерки за утврдување на вината и санкционирање на двајцата вработени.
Нагласуваме дека вакво однесување кон граѓаните нема да дозволиме бидејќи и избраните лица и општинската администрација работат и ќе работат во интерес на сите жители на Центар“, велат од Општината.