еМагазин
Image default
Македонија

Владини претставници со различен јазик за законот за јазици, во Владата демантираат конфликт

Не постојат конфликти или судири во Владата како што пишуваат медиумите, тврдат од Владата, по различните изјави на премиерот Зоран Заев и вицепремиерот за европски прашања Бујар Османи во однос на Законот за јазиците и неговото испраќање на разгледување во Венецијанската комисија.

„Во основа не постојат некои конфликти или судири како што пишуваат медиумите. Вчера имавме владина седница на која работите функционираат редовно и тековно. Како некој толкува одредени изјави, тоа сепак е во рамки на слободата на израз. Во секој случај, работата на Владата како институција е тековна и немаме никакви проблеми“, истакна вчера владиниот портпарол Миле Бошњаковски на редовната прес-конференција во Владата.

Ниту вицепремиерката и министерка за одбрана Радмила Шекеринска не гледа никакви дупки и проблеми во владината коалиција.

„Македонија нема зошто да се плаши ако различни партии имаат различен став како што и во партиите не е страшно кога различни луѓе имаат различен став, тоа е богатство“, истакна министерката Шекеринска, одговарајќи на прашање дали постои коалициска криза на партиите на власт.

Во однос на прашањето на двојазичност на униформите во АРМ, Шекеринска рече дека тоа прашање не е вградено во Законот за јазиците од причини кои се однесуваат на функционирање на Армијата и фактот дека униформите претпоставуваат униформност.

„Рековме дека оваа одредба ќе ја испратиме до Венецијанската комисија и очекуваме мислење и за Законот и за оваа конкретна можна потреба. Факт е дека Армијата е една од институциите која нуди најголема кохезија. Во делот на одбраната главната промена се однесува на можноста на граѓаните на Република Македонија кои обраќаат до Министерството за одбрана да можат да го користат и својот мајчин јазик, да добијат соодветен одговор. Не мислам дека тоа негативно ќе се одрази, а Армијата е посилна заради тоа што таа е репрезент на Македонија и заради тоа што ги имаме претставено сите етнички заедници“, истакна Шекеринска.

На оваа тема вчера беше прашан и претседателот на Собранието Талат Џафери, кој истакна оти смета дека не е противуствно испраќањето на Законот во Венецијанската комисија.

„Постапката за утврдување на кој било законски проект во соодветната европска комисија не е во никаква спротивност со Уставот“, рече Џафери и упати на Владата за поконкретни одговори, бидејќи тоа не е во надлежност на Собранието туку е владина одговорност.

Изминатите денови вицепремиерот Османи истакна дека до Венецијанската комисија се испратени само делови од Законот, по што следуваше соопштение од Владата во кое информираше дека посочениот Закон во целост е доставен до оваа Комисија на разгледување.

Премиерот Заев, пак, побара ДУИ да не си ги препишува заслугите на законот, оти тој е на сите кои гласале за него.

МИА

ПОВРЗАНИ ВЕСТИ

Заев вели дека албанскиот јазик е втор официјален јазик, соопштението на Владата кое го негира тоа не го прочитал

Заев подготвен прв да земе двојазичен пасош со новото име Република Северна Македонија

Колку ќе чини спроведувањето на двојазичноста: Само за Агенцијата за јазици предвидени 8 милиони, а за инспекторатот 7 милиони денари

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Дескоска за информациите дека ќе си оди од правда: Не сум јас Никола Тодоров да ги шетам сите ресори

Редакција

Обвинетите пратеници за „27 април“ се откажаа од давање исказ пред судот

Редакција

Независната пратеничка група на ВМРО-ДПМНЕ се сретна со Мицкоски „на негово барање“

Никола Осило