(Вознемирувачко видео) Автобус полн со деца за на екскурзија удри коњ во Струмичко

Коњ во локва крв кој едвај крева глава и умира среде улица, удрен од автобус кој превозува деца од ОУ „Вера Циривири“ на екскурзија, е глетката за која „Анима мунди“ биле информирани од страна на шокирани граѓани.

„Коњот умира пред очите на децата, дел од копитото му е искинато под тркалата на автобусот, без да кој било да му помогне, затоа што ниту еден ветеринар или институција не сакале бесплатно да дојдат и укажат помош.

Прашуваме кој ќе беше одговорен доколку оваа несреќа имаше и последици по човек, по децата? Или ќе се молчи и чека се додека човечка несреќа не се случи?

Пративме ветеринар кој се бори животното да преживее. Иако коњот е злоставуван, дошла полиција, тој повторно ќе заврши во рацете на оние кои го измачувале. Ова е срам и секојдневна реалност во Македонија, злоставување на животните до недоглед и опасност за секој инволвиран во сообраќајот по улиците“, велат од Здружението.

Од таму се обраќаат до сите надлежни институции (АХВ, МВР) и нивното раководство, до градоначалниците и бараат итно да се превземат мерки и законски оневозможи злоупотребата на коњите како превозно средство во урбани средини и мачењето на овие животни во иднина.

Воедно информираат дела „Анима Мунди“ изготви и поднесе Иницијатива за помош на коњите, со која дале конкретни применливи предлози за превземање на конкретни чекори кои би воделе кон унапредување на благосостојбата на коњите, зголемување на безбедноста на сите граѓани во сообраќајот и олеснување на животот на граѓаните кои се најранливата и најмаргинализираната категорија граѓани во нашето општество.