еМагазин
Image default
Македонија

Заев на дебатата „Две години Влада“: Граѓаните чекаат ЕУ да си ја исполни задачата

На двегодишнината од формирањето на Владата, премиерот Зоран Заев посочи на резултатите што се постигнати во изминатиот период посочувајќи дека суштинските промени се забележани и во Извештајот на ЕК за напредокот на Северна Македонија.

Заев нагласи дека сега граѓаните на Северна Македонија и Владата чекаат јасен потег од Европската унија и датум за почеток на преговори.

Задачите што ги исполни Владата, рече премиерот, донесоа суштински промени: ослободување на државата од заробеност, процес на деинсталација на режим и интеграција на земјата како пример кој блеска на Балканот.

– Барем така велат европјаните во најновиот Извештај за напредокот на нашата земја, но Извештајот не е доволен за граѓаните на Северна Македонија. Време е Европа да ја исполни својата задача пред своите европјани. Македонците, Албанците, Турците, Србите, Власите, Ромите, Бошњаците и сите други кои живеат во Северна Македонија се Европјани. Европјаните од Северна Македонија и Владата на Северна Македонија чекаат јасен потег од Европската унија, потенцираше Заев.

За неполни две години, потсети Заев, ги решивме сите отворени прашања со нашите соседи го решивме спорот со Грција, а претходно и со Бугарија.

– Наша должност беше да го зачуваме македонскиот идентитет. Го зачувавме, го потврдивме и го зајакнавме, дециден е премиерот.

Во своето обраќање премиерот наброја низа мерки и резултати што се постигнати во сите области и за она што би требало да се очекува. Заев исто така кажа дека уште по неговиот избор побарал поддршка и соработка со опозицијата, која, како што рече, кога беше на власт ја уназадила земјата.

– Го повторуваме барањето постојано зошто сметам дека Северна Македонија треба да ја градиме и понатаму со консензус од мнозинството од граѓаните. Опозицијата треба да го препознае тоа, да го даде својот придонес и да се вгради во остварувањето на интересите на Република Северна Македонија во интерес на сите граѓани, рече Заев.

На форумот организиран по повод двегодишнината од Владата, што се уште е во тек, се обратија и вицепремиерите Радмила Шекеринска, Бујар Османи, Оливер Спасовски и Кочо Анѓушев. Учествуваат и универзитетски професори, академици, бизнисмени и граѓански активисти.

На форумот, насловен „Две години Влада – одговорно пред граѓаните“, ќе се одржат две сесии. Првата сесија е насловена „Промени 2017-2019“: Од поделено и изолирано општество пред колапс, до стабилно, солидарно и почитувано општество“.
Втората сесија е насловена „Агенда 2019 – 2020: Фокусот на Владата до крајот на мандатот“.  Покрај премиерот Заев најавени се обраќања на новинарот Томислав Кежаровски, универзитетската професорка Беса Арифи, претседателот на МАНУ Таки Фити, претседателката на НВО „Амбрела“ и граѓанска активистка Љатифа Шиковска, директорката на „Хелсиншки комитет за човекови права“, Уранија Пировска, претприемачот Коста Петров и претседателот на Управен одбор на „НЛБ Банка АД Скопје“ Антонио Аргир.
На форумот присуствуваат претставници на дипломатскиот кор, на верските заедници, претставници на бизнис заедницата и други.
МИА/ФОТО: Влада
Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Грчките медиуми почнаа да го користат името Северна Македонија: Реакции за потпишаниот Протокол за НАТО

Редакција

Европска комисија: Унгарија сѐ уште не потврдила дека одобрила азил за Груевски

Редакција

Сашо Василевски: Гласав „за“ со чиста мисла и храброст

Редакција