Од Центар за комуникации на ВМРО-ДПМНЕ, Општински комитет – Струга објавија фотографија на големо знаме на Република Албанија, поставено вчера во холот на СОУ „Нико Нестор” – Струга.
“Слични случувања, вмешување на ученици и деца во политички и партиски интереси има и во други училишта и градинки низ општината.
Жално и срамно е да се уништува детството и од најрана возраст да се создаваат меѓуетнички тензии и раздор кај најмладите на национална и верска основа“, велат од Општински комитет – Струга и додаваат:
„Би сакале да го запрашаме директорот Миле Попоски со која цел, па и со каков образ донел ваква срамна одлука, притоа не запазувајќи и грубо кршејќи го Законот за употреба на знамињата, со кој сите сме свесни дека треба да биде поставено и македонското знаме покрај албанското, но се разбира никако во тие размери и димензии.
Иако, ќе повториме, дека не се празнува државен празник на Република Македонија, туку празник на друга држава. Ова претставува разнебитување и раскол на образовниот процес и уништување на фундаменталната функција на образованието, па затоа бараме одговорност за оваа непромислена постапка на директорот.
И за крај, господа од актуелната владина коалиција, на овој начин ли ќе градиме соживот во Струга?“.
Знамето е поставено во рамките на одбележување на Денот на албанското знаме, кој не е државен празник во Македонија.
Фото: Фејсбук/Центар за комуникации на ВМРО-ДПМНЕ, Општински комитет – Струга