Македонската компанија ЕЛС, која на македонските граѓани им ги доставува нарачките од Temu и AliExpress, за годинава најавува можност за нарачка преку уште 5-6 платформи, како што е познатата Шеин и платформи за нарачка на техника, вели сопственикот Игор Гешовски, за еМагазин.мк
„Нашата цел е една – продавниците ние да ги носиме кај луѓето, со оглед на тоа што повеќе од 50 отсто од пазарот го држи ЕЛС. Многу скоро ќе воведеме можност за нарачка преку уште 5-6 платформи, како што е познатата Шеин и платформи за нарачка на техника,“ вели Гешовски на прашањето за бизнис-плановите за годинава.
Компанијата го отвори и првиот Фулфилмент центар, магацин од 1.000 квадратни метри каде што ќе им се чува робата на компаниите.
„Сето тоа е кодирано, сѐ е под камери, робата се евидентира, компаниите нѐ известуваат која роба каде треба да се однесе, а ние ја сортираме, пакуваме, бележиме и ја носиме до крајната дестинација.
На тој начин компаниите заштедуваат оти инаку секој треба да има магационери, управа, објекти, шофери и слично,“ додава Гешовски.
Сепак, неговата најголема желба во која што се вложува комплетно е да се почне со извоз на македонски продукти на меѓународниот пазар, што ќе придонесе за поголем економски раст и поголема можност за заработка на македонските компании.
ПОВРЗАНИ ВЕСТИ
Гешовски: Од Тему наместо до 22, ќе може да се купува и до 90 евра на што ќе се плаќа данок