Компанијата „Aгна“ од Албанија сака да го купи македонскиот „Мако маркет“ ДОО Скопје.
Информацијата ја соопштија од Комисијата за заштита на конкуренцијата.
„Мако маркет“ е друштво за трговија на големо и мало, кое нуди услуги на трговија на големо со стоки за широка потрошувачка, како и производство на кондиторски производи и пуканки.
Присутно е на целата територија на Македонија преку логистички центар, производствен погон и развиена дистрибутивна и продажна мрежа.
„Aгна“ со седиште во Ѓирокастер, Врисера, пак е веќе присутна во Македонија преку својата подружница „Агна инветсментс“, која се занимава со издавање, управување и инвестирање во недвижен имот и како сопственик на „Певец интернационал“.
Компанијата е приватно акционерско друштво во сопственост на Васил Наци, Кристо Наци и Коста Сотири, и се се занимава со трговија на големо и дистрибуција на стоки за широка потрошувачка – прехранбени производи, производи за лична хигиена, производи од тутун, безалкохолни и алкохолни пијалоци.
Дополнителни дејности и се производство и продажба на безалкохолни и алкохолни пијалоци, логистика и транспорт на стоки, како и дејности поврзани со градежништвото, вклучувајќи и инвестиции во изградба, купување и продажба на земјиште, туристички комплекси, хотели и слични инфраструктурни проекти.
-Врз основа на прелиминарното испитување Комисијата утврди дека предметната концентрација може да потпадне под одредбите на Законот за заштита на конкуренцијата. Сепак конечната одлука по ова прашање е резервирана, велат од Комисијата.
Фото: Унсплеш
