Титан Усје годинава го прославува својот 70-годишен јубилеј, обележувајќи седум децении од своите почетоци во 1955 година. Од своето основање, компанијата растеше паралелно со развојот на земјата, поддржувајќи изградба на домови, училишта, болници, патишта, мостови и друга суштинска инфраструктура која го обликува современото општество, информираат од таму.
Во текот на децениите, Титан Усје инвестираше повеќе од 200 милиони евра во модернизација и технолошки напредок. Овие инвестиции значајно ја подобрија безбедноста, оперативната ефикасност, продуктивноста и перформансите во доменот на заштитата на животната средина, посочуваат од таму.
Денес, Титан Усје се истакнува како современа компанија со напредни дигитални технологии и автоматизација на производството, подвлекуваат од таму.
Во 1998 година Усје стана дел од Групацијата Титан, со што се забрза развојот на компанијата преку размена на глобално знаење, најдобри практики и корпоративни вредности, како и пристап до напредни технологии и меѓународни стандарди. Тоа ја зајакна иновативната способност на компанијата, ја зголеми конкурентноста и го потврди нејзиниот статус на лидер во индустријата, усогласен со глобалните трендови и потребите на пазарот, велат од таму.
„Титан Усје е тоа што е денес, благодарение на нашите вработени – повеќе од 3.000 вработени кои низ годините ја обликуваа компанијата преку својот труд, знаење и вредности кои постојано нѐ движат напред.
Нашата грижа за заедницата е дел од нас, ние сме одговорен и доверлив партнер кој создава можности, поддржува и поттикнува развој.
Со поглед кон иднината, ќе продолжиме да инвестираме во иновации, нови технологии и современи решенија, обезбедувајќи Титан Усје да остане водечка компанија и сигурен партнер во развојот на земјата“, рече главниот извршен директор, Константинос Николау, обраќајќи им се на сите партнери, вработени, пријатели и гости на јубилејната прослава.
Во своето обраќање, Јанис Паниарас, извршен директор за Европа во Групацијата Титан, истакна: „Во изминатите седум децении, Усје претставува важен столб во економскиот и општествениот развој на земјата, обезбедувајќи материјали за изградба на клучна инфраструктура и поддржувајќи го вработувањето, локалните заедници и националната економија.
Титан со гордост го има Титан Усје како дел од нашето глобално семејство уште од 1998 година. Денес, компанијата е посилна од било кога, комбинирајќи огромно индустриско знаење со најсовремени технологии и силен тим на посветени вработени, изведувачи и деловни партнери. Гледајќи кон иднината, остануваме цврсто посветени на одржлив развој.
Нашиот континуиран фокус на иновации и инвестиции во луѓето и во развојот на компанијата ќе обезбеди Титан Усје и понатаму да остане лидер во индустријата за градежни материјали и двигател на напредокот во децениите што следуваат“.
Преку инвестициите во вештачката интелигенција и брзата трансформација Титан Усје ги поставува темелите за идниот одржлив развој на компанијата и за планови за дополнителни инвестиции во иновативни и „зелени“ технологии во вредност од 50 милиони евра до 2030 година. Во фокус и понатаму ќе бидат дигитализацијата, машинското учење, вештачката интелигенција и понатамошното намалување на јаглеродниот отпечаток, велат од таму.
