За 11 милиони евра 14 згради на јавни институции во кои се сместени 33 државни институции, ќе добијат енергетски ефикасни фасади.
На проектот, како што информираа од Министерството за енергетика, рударство и минерални суровини ќе се работи три години.
Во првата фаза ќе се реновираат зградите на Министерството за здравство заедно со Институтот за јавно здравје и Државниот санитарен и здравствен инспекторат, зградата на Државниот завод за статистика, објектот на Агенцијата за катастар на недвижности и главната зграда на Управата за хидрометеоролошки работи.
Фасадите на овие згради, како што велат од таму, се во лоша состојба, па затоа на нив ќе се работи во оваа фаза.
Во втората се опфатени комплексот на Министерството за економија и труд, зградата во која се сместени Агенцијата за администрација, Државниот инспекторат за енергетика, рударство и минерални суровини и зградата на поранешна ‘Нова Македонија’, каде се сместени Министерството за информатичко општество и администрација, Министерството за образование и наука, Министерството за локална самоуправа, Агенцијата за лекови и Секретаријатот за законодавство, кои се во подобра состојба.
Со третата фаза ќе бидат опфатени осум објекти кои претходно биле реновирани, но кои имаат потреба од енергетска надградба и современи системи.
